சிவகங்கை ரவுடி மதன் கொலை வழக்கு: மேலும் 4 பேர் கைது - கைது செய்யப்பட்டவர்களின் எண்ணிக்கை 7 ஆக உயர்வு!

சிவகங்கை மாவட்டம் மேலமங்களம் பகுதியில் ரவுடி 'சுள்ளான்' மதன் வெட்டிக் கொலை செய்யப்பட்ட வழக்கில், தலைமறைவாக இருந்த மேலும் 4 பேரை காவல்துறையினர் அதிரடியாகக் கைது செய்துள்ளனர்.

சிவகங்கை மாவட்டம் மேலமங்களம் பகுதியில் நிகழ்ந்த ரவுடி சுள்ளான் மதன் படுகொலை வழக்கில் காவல்துறையினர் தீவிர விசாரணை நடத்தி வருகின்றனர். இக்கொலை தொடர்பாக ஏற்கனவே 3 பேர் கைது செய்யப்பட்டிருந்த நிலையில், தலைமறைவாக இருந்த மற்ற குற்றவாளிகளைத் தேடும் பணி முடுக்கிவிடப்பட்டிருந்தது.

இந்நிலையில் தீவிர தேடுதல் வேட்டைக்குப் பிறகு, இவ்வழக்கோடு தொடர்புடைய சந்தோஷ் (19), ஜெய மாணிக்ராஜ் (20), முத்து சூர்யா (20), விக்னேஷ் (23) என மேலும் 4 வாலிபர்களைப் போலீசார் கைது செய்துள்ளனர்.  இவர்களின் கைது நடவடிக்கையோடு சேர்த்து, இந்த வழக்கில் இதுவரை கைது செய்யப்பட்டவர்களின் மொத்த எண்ணிக்கை 7 ஆக உயர்ந்துள்ளது.

இக்கொலை வழக்கில் தொடர்புடைய மற்ற குற்றவாளிகளையும் விரைவில் கூண்டோடு பிடிக்கக் காவல் துறை சார்பில் 6 தனிப்படைகள் அமைக்கப்பட்டுள்ளன. தனிப்படையினர் பல்வேறு இடங்களில் தீவிரத் தேடுதல் வேட்டையில் ஈடுபட்டு வருவதாகக் காவல்துறையினர் தரப்பில் தெரிவிக்கப்பட்டுள்ளது.