15 வயதுக்குட்பட்ட சிறுவர்கள் சமூக வலைத்தளங்களைப் பயன்படுத்த முழுமையான தடை !

ஐக்கிய அரபு அமீரகத்தில் (யுஏஇ) வசிக்கும் லட்சக்கணக்கான குடும்பங்களைப் பாதிக்கும் வகையில் ஒரு  சட்ட நெறிமுறையை அம்மாநில அமைச்சரவை முறைப்படி அறிவித்துள்ளது.  துபாய் ஆட்சியாளரும், ஐக்கிய அரபு அமீரகத்தின் பிரதமருமான ஷேக் முகமது பின் ரஷித் அல் மக்தூம் தலைமையில் நடைபெற்ற முக்கியக் கூட்டத்தில் இதற்கான ஒப்புதல் வழங்கப்பட்டுள்ளது. இதன்படி அங்குள்ள 15 வயதுக்குட்பட்ட சிறுவர்கள் இனி முகநூல், இன்ஸ்டாகிராம், டிக்டாக் மற்றும் யூடியூப் உள்ளிட்ட எந்தவொரு சமூக வலைத்தளங்களிலும் தங்களது சொந்தப் பெயரில் கணக்குகளைத் தொடங்கவோ அல்லது பயன்படுத்தவோ முடியாது.

சிறுவர்களின் மனநலம், இணையவழிப் பாதுகாப்பு மற்றும் தனிநபர் தரவுகள் திருடப்படுவதைத் தடுக்கும் நோக்கில் இந்த புதிய கட்டுப்பாடுகள் மிகத் தீவிரமாகக் கொண்டு வரப்பட்டுள்ளன. 15 முதல் 16 வயதிற்குட்பட்ட வளரிளம் பருவத்தினர் மட்டும் தங்களது பெற்றோரின் கடுமையான கண்காணிப்பு மற்றும் குறிப்பிட்ட நேரக் கட்டுப்பாடுகளுடன் இந்தச் செயலிகளைப் பயன்படுத்தச் சற்றே அனுமதிக்கப்படுவர். இந்த சட்ட விதிகளிலிருந்து தப்பிப்பதற்காகப் பெற்றோர்கள் தங்களது அனுமதிக் கடிதங்களை வழங்கினாலும், அது எவ்விதத்திலும் செல்லுபடியாகாது என அரசு அதிகாரிகள் திட்டவட்டமாகத் தெரிவித்துள்ளனர்.

இந்த புதிய சட்ட விதிகளைத் தங்களது தளங்களில் முழுமையாக நடைமுறைப்படுத்தச் சமூக வலைத்தள நிறுவனங்களுக்குச் சரியாக 12 மாதங்கள் வரை கால அவகாசம் வழங்கப்பட்டுள்ளது. அதற்குள் அனைத்து நிறுவனங்களும் துல்லியமான வயது சரிபார்ப்புத் தொழில்நுட்ப முறைகளைத் தங்களது செயலிகளில் முறைப்படி கொண்டு வர வேண்டும் என அறிவுறுத்தப்பட்டுள்ளது. அரபு நாடுகளில் முதன்முறையாக ஐக்கிய அரபு அமீரகம் கொண்டு வந்துள்ள இந்த   இணையக் கட்டுப்பாடு, அங்கு வாழும் 35 லட்சத்திற்கும் அதிகமான இந்தியக் குடும்பங்கள் மத்தியிலும்  மிகப்பெரிய விவாதத்தை ஏற்படுத்தியுள்ளது.