தென் கொரிய அதிபர் இந்தியா வருகை!

தென்கொரிய அதிபர் லீ ஜே மியுங், பிரதமர் மோடியின் அழைப்பின் பேரில் 3 நாள் அரசுமுறைப் பயணமாக வரும் 19-ம் தேதி இந்தியா வருகிறார். அதிபராகப் பதவியேற்ற பிறகு அவர் இந்தியாவிற்கு வருவது இதுவே முதல் முறையாகும். இப்பயணத்தின் போது வரும் 20-ம் தேதி பிரதமர் மோடியுடன் அவர் உயர்மட்டப் பேச்சுவார்த்தை நடத்துவார் என்று எதிர்பார்க்கப்படுகிறது.

இந்தச் சந்திப்பில் இரு நாடுகளுக்கும் இடையிலான வர்த்தகத்தை 2030-ஆம் ஆண்டிற்குள் 50 பில்லியன் அமெரிக்க டாலராக உயர்த்த இலக்கு நிர்ணயிக்கப்பட்டுள்ளது. கப்பல் கட்டுதல், செமிகண்டக்டர்கள் மற்றும் செயற்கை நுண்ணறிவு போன்ற நவீன தொழில்நுட்பத் துறைகளில் இணைந்து செயல்படுவது குறித்து ஆலோசிக்கப்படும். பாதுகாப்புத் துறையிலும் விநியோகச் சங்கிலியை வலுப்படுத்துவதிலும் முக்கிய ஒப்பந்தங்கள் கையெழுத்தாக வாய்ப்புள்ளது.

ஆசியப் பிராந்தியத்தில் தென்கொரியா இந்தியாவின் முக்கியக் கூட்டாளியாக விளங்கும் நிலையில், இந்த வருகை மிக முக்கியமானதாகக் கருதப்படுகிறது. மின்னணு சாதனங்கள் உற்பத்தி மற்றும் தொழில்நுட்பப் பரிமாற்றத்தில் புதிய மைல்கல்லை எட்ட இரு நாடுகளும் திட்டமிட்டுள்ளன. இந்த அரசுமுறைப் பயணம் இரு நாடுகளின் உறவை அடுத்த கட்டத்திற்கு எடுத்துச் செல்லும் என வெளியுறவுத் துறை அமைச்சகம் தெரிவித்துள்ளது.