தெற்கு ரயில்வே 2025-26 நிதியாண்டில் ரூ.8,269 கோடி வருவாய் ஈட்டி சாதனை!

இந்திய ரயில்வேயின் முக்கிய மண்டலங்களில் ஒன்றான தெற்கு ரயில்வே, 2025-26 நிதியாண்டில் வருவாய் ஈட்டுவதில் புதிய வரலாற்றுச் சாதனையைப் பதிவு செய்துள்ளது. பயணிகள் போக்குவரத்து மற்றும் சரக்கு கையாளுதல் மூலம் முன்னெப்போதும் இல்லாத வகையில் லாபம் ஈட்டியுள்ளதாகத் தெரிவிக்கப்பட்டுள்ளது.

கடந்த நிதியாண்டோடு ஒப்பிடுகையில், இந்த ஆண்டு தெற்கு ரயில்வேயின் ஒட்டுமொத்த வளர்ச்சி வியக்கத்தக்க வகையில் உயர்ந்துள்ளது. பயணிகள் டிக்கெட் விற்பனை மூலம் மட்டும் ரூ.8,269 கோடி வருவாய் ஈட்டப்பட்டுள்ளது. இது கடந்த ஆண்டை விட 9.7% கூடுதலாகும்.

நிலக்கரி, உணவு தானியங்கள் மற்றும் சிமெண்ட் உள்ளிட்ட சரக்குகளைக் கையாண்டதன் மூலம் ரூ.3,811 கோடி வருவாய் கிடைத்துள்ளது. டிக்கெட் பரிசோதனையின் போது விதிகளை மீறியவர்களிடமிருந்து அபராதமாக மட்டும் ரூ.160 கோடி வசூலிக்கப்பட்டுள்ளது.

ரயில்வே வாரியம் 2025-26 நிதியாண்டிற்கான வருவாய் இலக்கை நிர்ணயித்திருந்தது. ஆனால், தெற்கு ரயில்வே தனது சிறப்பான செயல்பாட்டின் மூலம், அந்த 12 மாத கால இலக்கை வெறும் 11 மாதங்களிலேயே எட்டிப்பிடித்துச் சாதனை படைத்துள்ளது.

விளம்பரங்கள், ரயில் நிலையங்களில் உள்ள கடைகள் மற்றும் வாகன நிறுத்துமிடங்கள் மூலம் எதிர்பார்க்கப்பட்டதை விடக் கூடுதல் வருவாய் கிடைத்துள்ளதாகத் தெற்கு ரயில்வே பொது மேலாளர் தெரிவித்துள்ளார்.

இந்த அபரிமிதமான வளர்ச்சிக்கு முக்கியக் காரணங்களாக, பண்டிகை காலங்களில் இயக்கப்பட்ட சிறப்பு ரயில்கள் மற்றும் வந்தே பாரத் ரயில்களுக்குக் கிடைத்த பெரும் வரவேற்பு. யுடிஎஸ் செயலி மற்றும் ஆன்லைன் டிக்கெட் முன்பதிவு அதிகரிப்பு. சரக்கு ரயில்களின் வேகத்தை அதிகரித்தது மற்றும் புதிய வர்த்தகத் தொடர்புகள் ஆகியவை கருதப்படுகிறது.

தெற்கு ரயில்வேயின் இந்த வருவாய் உயர்வு, வரும் காலங்களில் ரயில் நிலையங்களை மேம்படுத்தவும், புதிய வழித்தடங்களில் ரயில்களை இயக்கவும் பெரும் உதவியாக இருக்கும் என எதிர்பார்க்கப்படுகிறது.