45 பவுன் நகையை ஒப்படைத்த தூய்மை பணியாளர் - முதல்வர் ஸ்டாலின் ரூ.1 லட்சம் நிதியுதவி!

"நேர்மைக்கு என்றும் அழிவில்லை" என்பதை மெய்ப்பிக்கும் வகையில், சென்னையில் ஒரு நெகிழ்ச்சியான சம்பவம் அரங்கேறியுள்ளது. ஏழ்மை நிலையிலும், அடுத்தவர் சொத்துக்கு ஆசைப்படாத ஒரு தூய்மைப் பணியாளரின் உயர்ந்த குணம் இன்று ஒட்டுமொத்த தமிழகத்தையே திரும்பிப் பார்க்க வைத்துள்ளது.

சென்னை தியாகராய நகர்  பகுதி எப்போதும் மக்கள் நடமாட்டம் மிகுந்த இடமாகும். நேற்று வழக்கம் போல இப்பகுதியில் தூய்மைப் பணியாளர் பத்மா தனது பணியில் ஈடுபட்டிருந்தார். அப்போது சாலையோரம் கேட்பாரற்றுக் கிடந்த ஒரு பையை அவர் கவனித்துள்ளார். ஆர்வத்துடன் அதனை எடுத்துப் பார்த்த அவருக்கு பேரதிர்ச்சி காத்திருந்தது. அந்தப் பையில் பளபளக்கும் தங்க நகைகள் அடுக்கி வைக்கப்பட்டிருந்தன.

சுமார் 45 பவுன் எடையுள்ள அந்தத் தங்க நகைகளின் இன்றைய சந்தை மதிப்பு சுமார் 45 லட்ச ரூபாய்க்கும் மேல் இருக்கும். சாதாரண நடுத்தரக் குடும்பத்தினர் ஒரு வாழ்நாள் முழுவதும் உழைத்தாலும் ஈட்ட முடியாத அந்தப் பெரும் தொகையைக் கண்டும், பத்மா ஒரு நிமிடம் கூடத் தயங்கவில்லை. அந்த நகைகளைத் தனது உடைமையாக்கிக் கொள்ள வேண்டும் என்ற எண்ணம் அவருக்குத் துளிகூட வரவில்லை. உடனடியாக அந்தப் பையுடன் பாண்டி பஜார் காவல் நிலையத்திற்கு விரைந்தார்.

காவல் நிலையத்தில் நகைகளை அவர் ஒப்படைத்தபோது, போலீசார் அவரது நேர்மையைக் கண்டு வியந்து போனார்கள். போலீசார் நடத்திய விசாரணையில், அந்த நகைகள் ஒரு குடும்பத்தினரால் கவனக்குறைவாகத் தவறவிடப்பட்டது தெரியவந்தது. இதையடுத்து உரிய ஆதாரங்களைச் சரிபார்த்து, சுமார் 45 லட்ச ரூபாய் மதிப்புள்ள நகைகள் அதன் உரிமையாளரிடம் பாதுகாப்பாக ஒப்படைக்கப்பட்டது. தங்கம் விலை ரூ.1 லட்சத்தைத் தாண்டி விற்கும் இந்தச் சூழலில், பத்மாவின் இந்தச் செயல் சமூக வலைதளங்களில் காட்டுத்தீயாய் பரவி, பாராட்டுகள் குவியத் தொடங்கின.

பத்மாவின் இந்த உயரிய நேர்மை குறித்த செய்தி தமிழ்நாடு முதலமைச்சர் மு.க.ஸ்டாலின் அவர்களின் கவனத்திற்குச் சென்றது. உடனடியாக அவரை நேரில் சந்திக்க முதல்வர் அழைப்பு விடுத்தார். இன்று தலைமைச் செயலகத்தில் நடைபெற்ற சந்திப்பில், பத்மாவை நேரில் அழைத்து முதல்வர் பாராட்டு தெரிவித்தார். அவருக்குச் சால்வை அணிவித்து கௌரவித்ததோடு, அவரது நேர்மைக்குக் கிடைத்த அங்கீகாரமாக அரசு சார்பில் ரூ.1 லட்சத்திற்கான காசோலையைப் பரிசாக வழங்கினார்.

"ஏழ்மையிலும் செம்மை காத்து, மற்றவர்களுக்கு முன்னுதாரணமாகத் திகழும் பத்மா போன்றவர்கள் தான் இந்தச் சமூகத்தின் உண்மையான அடையாளங்கள்" என்று முதல்வர் புகழாரம் சூட்டினார். இந்தச் சம்பவம், மனிதநேயம் இன்னும் உயிர்ப்புடன் இருப்பதை உணர்த்துவதாக பொதுமக்கள் நெகிழ்ச்சியுடன் தெரிவித்து வருகின்றனர்.