இன்று ஸ்டாலின் வேட்புமனு தாக்கல் செய்கிறார் - கொளத்தூரில் பலத்த பாதுகாப்பு ஏற்பாடுகள்!

2026 தமிழக சட்டமன்றத் தேர்தலில் திமுகவின் கோட்டையாகக் கருதப்படும் கொளத்தூர் தொகுதியில், முதலமைச்சர் மு.க. ஸ்டாலின் இன்று அதிகாரப்பூர்வமாகத் தனது வேட்புமனுவைத் தாக்கல் செய்கிறார்.

செம்பியம் பேப்பர் மில்ஸ் சாலையில் அமைந்துள்ள சென்னை மாநகராட்சி மண்டல அலுவலகம் (கொளத்தூர் தொகுதி தேர்தல் நடத்தும் அதிகாரி அலுவலகம்) இன்று (திங்கட்கிழமை) மதியம் சரியாக 12 மணியளவில்,  கொளத்தூர் தொகுதி தேர்தல் நடத்தும் அதிகாரியான எஸ். சாந்தியிடம் ஸ்டாலின் தனது வேட்புமனுவை சமர்ப்பிக்கிறார்.

முதலமைச்சர் மு.க. ஸ்டாலின் கடந்த 2011, 2016 மற்றும் 2021 ஆகிய மூன்று சட்டமன்றத் தேர்தல்களிலும் கொளத்தூர் தொகுதியில் போட்டியிட்டுத் தொடர்ச்சியாக வெற்றி பெற்றுள்ளார். தற்போது 4-வது முறையாக அதே தொகுதியில் களம் இறங்குவது, அந்தத் தொகுதி மக்கள் மீது அவர் கொண்டுள்ள நம்பிக்கையைக் காட்டுகிறது.

இன்று வேட்புமனுவைத் தாக்கல் செய்த பிறகு, நாளை தனது தந்தையின் ஊரான திருவாரூரில் இருந்து முதற்கட்டத் தேர்தல் பிரசாரத்தைச் சீறிப்பாயத் தொடங்குகிறார். அங்கு தொடங்கி திருச்சி, கரூர், ஈரோடு மற்றும் கோவை எனத் தமிழகம் முழுவதும் சூறாவளிப் பயணம் மேற்கொள்ளத் திட்டமிட்டுள்ளார்.

முதலமைச்சரின் வருகையையொட்டி கொளத்தூர் மற்றும் செம்பியம் பகுதிகளில் பலத்த போலீஸ் பாதுகாப்பு போடப்பட்டுள்ளது. திமுக நிர்வாகிகள் மற்றும் தொண்டர்கள் உற்சாகத்துடன் திரண்டு வருவதால் அந்தப் பகுதியில் போக்குவரத்து மாற்றங்களும் செய்யப்பட்டுள்ளன.