தங்கத்தில் கலப்படம் செய்தால் கடும் நடவடிக்கை - தர நிர்ணய ஆணையம் எச்சரிக்கை!
சீனாவிலிருந்து கொண்டுவரப்படும் ‘ரீனியம்’ என்ற வேதிப்பொருளைத் தங்கத்தில் கலந்து கலப்படம் செய்வதாகக் கடந்த சில நாட்களாகத் தகவல்கள் வெளியாகி வரும் நிலையில், தங்கத்தில் கலப்படம் செய்பவர்கள் மற்றும் அதற்கான பொருட்களைத் தயாரிப்பவர்கள் மீது மிகக் கடுமையான சட்ட நடவடிக்கை எடுக்கப்படும் என இந்திய தர நிர்ணய ஆணையம் எச்சரிக்கை விடுத்துள்ளது.
தங்க நகைகள் அல்லது தங்கக் கட்டிகளின் எடை மற்றும் அமைப்பில் மாற்றம் செய்வதற்காகச் சீனாவிலிருந்து ரீனியம் என்ற வேதிப்பொருள் கொண்டுவரப்பட்டுத் தங்கத்தில் கலக்கப்படுவதாகச் சமூக வலைதளங்களிலும் சில வட்டாரங்களிலும் பரபரப்புத் தகவல்கள் பரவி வருகின்றன.

தங்கத்தின் தூய்மை மற்றும் தரத்தை உறுதி செய்யும் பொறுப்பில் உள்ள இந்திய தர நிர்ணய ஆணையம், இந்தக் கலப்படப் புகார்கள் மற்றும் தகவல்களை தீவிரமாகக் கவனத்தில் கொண்டுள்ளது. தங்கத்தில் கலப்படம் செய்வதற்கான வேதிப்பொருட்கள் அல்லது இதர கலப்படப் பொருட்களைத் தயாரிப்பவர்கள், விநியோகிப்பவர்கள் மற்றும் நகைகளில் கலப்படம் செய்யப் பயன்படுத்துபவர்கள் என எவராக இருந்தாலும், அவர்கள் மீது கடும் நடவடிக்கை பாயும் எனத் தெரிவிக்கப்பட்டுள்ளது.
விதிகளை மீறித் தங்கத்தின் தூய்மையில் முறைகேடு செய்வது நுகர்வோரை ஏமாற்றும் செயலாதலால், சம்பந்தப்பட்டவர்கள் மீது சட்டப்படி கடுமையான அபராதம் மற்றும் தண்டனை நடவடிக்கைகள் எடுக்கப்படும் என எச்சரிக்கப்பட்டுள்ளது.

தங்கத்தின் விலை ஏற்ற இறக்கங்களுக்கு இடையே, நகை வாங்கும்போது வாடிக்கையாளர்கள் அதிக விழிப்புடன் இருக்க வேண்டியது அவசியமாகியுள்ளது. அங்கீகரிக்கப்பட்ட நகைக் கடைகளில் தரச்சான்றிதழுடன் கூடிய நகைகளை வாங்குவதும், தூய்மை குறித்துச் சந்தேகம் ஏற்பட்டால் உரிய நடைமுறைகள் மூலம் பரிசோதிப்பதும் நுகர்வோருக்குப் பாதுகாப்பை அளிக்கும் எனத் தரப்பு வட்டாரங்கள் கருதுகின்றன.
