மீனவர்கள் ஒரு நாள் வேலைநிறுத்தப் போராட்டம்... ராமேஸ்வரத்தில் பரபரப்பு!

இலங்கை கடற்படையால் 11 மீனவர்கள் கைது செய்யப்பட்டதைக் கண்டித்து ராமேஸ்வரம் மீனவர்கள் இன்று ஒருநாள் அடையாள வேலைநிறுத்தப் போராட்டத்தில் ஈடுபட்டுள்ளனர். படகு இயந்திரம் பழுதடைந்ததன் காரணமாகக் கரை ஒதுங்கிய தமிழக மீனவர்களை எந்தவித நியாயமும் இன்றி இலங்கை கடற்படை கைது செய்துள்ளதை மீனவச் சங்கங்கள் வன்மையாகக் கண்டித்துள்ளன. எல்லை தாண்டி மீன்பிடித்ததாகக் கூறி கைது செய்யப்பட்ட இந்தப் பிரச்சினைக்கு உடனடித் தீர்வு காண வேண்டும் என மத்திய மற்றும் மாநில அரசுகளுக்குத் தொடர் கோரிக்கைகள் விடுக்கப்பட்டு வருகின்றன.

நெடுந்தீவு அருகே மீன்பிடித்ததாகக் கூறி கைது செய்யப்பட்ட 11 மீனவர்களும் நேற்று வெள்ளிக்கிழமை ஊர்காவல் துறை நீதிமன்றத்தில் பாதுகாப்பாக ஆஜர்படுத்தப்பட்டனர். நீதிபதி முன்னிலையில் ஆஜர்படுத்தப்பட்ட அந்த மீனவர்களை ஆகஸ்ட் 21 வரை நீதிமன்றக் காவலில் வைக்குமாறு உத்தரவிடப்பட்டு அவர்கள் யாழ்ப்பாணம் சிறையில் அடைக்கப்பட்டுள்ளனர்.

அடுத்தடுத்து நடக்கும் கைது நடவடிக்கைகளால் எல்லைப் பகுதியில் மீன்பிடிக்கச் செல்லும் தமிழக மீனவர்களின் வாழ்வாதாரம் மற்றும் பாதுகாப்பு பெரும் கேள்விக்குறியாக மாறியுள்ளது.நாள்தோறும் தொடர்ந்து கைது செய்யப்படும் மீனவர்களை உடனடியாக விடுவிக்க உரிய தூதரக அளவிலான நடவடிக்கைகளை மத்திய அரசு தீவிரமாக மேற்கொள்ள வேண்டும் என மீனவ குடும்பங்கள் கண்ணீருடன் கோரிக்கை விடுத்துள்ளனர். வேலைநிறுத்தப் போராட்டம் காரணமாக ராமேஸ்வரம் கடல் பகுதியில் நூற்றுக்கணக்கான விசைப்படகுகள் கடலுக்குச் செல்லாமல் கரையோரம் நிறுத்தப்பட்டு மீன்பிடித் தொழில்கள் முழுமையாக முடங்கியுள்ளன