தீபாவளிக்கு மறுநாள் திங்கட்கிழமை தமிழக அரசு விடுமுறை அறிவிப்பு!

வரும் தீபாவளிப் பண்டிகையை முன்னிட்டு, பண்டிகைக்கு மறுநாளான நவம்பர் 9-ஆம் தேதி திங்கட்கிழமை அன்று தமிழகம் முழுவதும் உள்ளூர் விடுமுறை வழங்கி மாநில அரசு உத்தரவிட்டுள்ளது.

நவம்பர் 9, திங்கட்கிழமை அன்று தமிழகத்தில் உள்ள அனைத்து அரசு அலுவலகங்கள், பொதுத்துறை நிறுவனங்கள், பள்ளிகள் மற்றும் கல்லூரிகளுக்கு உள்ளூர் விடுமுறை அளிக்கப்படுவதாக அதிகாரப்பூர்வமாக அறிவிக்கப்பட்டுள்ளது.

இந்த உள்ளூர் விடுமுறையை ஈடு செய்யும் வகையில், வரும் நவம்பர் 28, சனிக்கிழமை அன்று அனைத்து அரசு அலுவலகங்கள் மற்றும் கல்வி நிறுவனங்களுக்கும் வழக்கமான வேலை நாளாகச் செயல்படும் எனத் தெரிவிக்கப்பட்டுள்ளது.

அவசர நிதி மற்றும் நிர்வாகப் பணிகளைக் கருத்தில் கொண்டு, மாவட்டக் கருவூலங்கள் மற்றும் சார்நிலைக் கருவூலங்கள் மட்டும் குறிப்பிட்ட எண்ணிக்கையிலான பணியாளர்களுடன் அன்றைய தினம் இயங்கும் என்றும் அரசு சார்பில் தெளிவுபடுத்தப்பட்டுள்ளது.

தீபாவளிப் பண்டிகையைத் தொடர்ந்து வெளியூர்களுக்குச் சென்று திரும்பும் பொதுமக்கள் மற்றும் மாணவர்களின் வசதிக்காக இந்த விடுமுறை அறிவிக்கப்பட்டுள்ளது.