டெல்லி புறப்பட்டது தமிழக அமைச்சர்கள் குழு - நேபாள வெள்ளத்தில் சிக்கிய தமிழர்களை மீட்க நடவடிக்கை!

நேபாளத்தில் ஏற்பட்ட கோர திடீர் வெள்ளப்பெருக்கில் சிக்கித் தவிக்கும் தமிழர்களைப் பாதுகாப்பாக மீட்கும் பணிகளைத் தீவிரப்படுத்துவதற்காக, தமிழக அரசின் அமைச்சர்கள் குழு டெல்லிக்குப் பயணம் மேற்கொண்டுள்ளது.

நேபாளம் மற்றும் திபெத் எல்லையில் நிகழ்ந்த பனிச்சரிவு மற்றும் போதேகோசி நதி வெள்ளப்பெருக்கு காரணமாக நூற்றுக்கணக்கானோர் உயிரிழந்துள்ள நிலையில், அங்குள்ள முகாம்களில் சிக்கியுள்ள தமிழர்களை விரைந்து மீட்க மத்திய அரசின் அயலக விவகார அமைச்சகத்துடன் இணைந்து இக்குழு செயல்படவுள்ளது.

மீட்புப் பணிகளைத் துரிதப்படுத்துவது குறித்தும், ஹெலிகாப்டர் மற்றும் தரைவழிப் போக்குவரத்து மூலம் தமிழர்களைப் பாதுகாப்பாக மீட்டு தமிழகம் அழைத்து வருவது குறித்தும் மத்திய அமைச்சர்களை நேரில் சந்தித்து விவாதிக்க இந்த அமைச்சர்கள் குழு டெல்லி சென்றுள்ளது.

ஏற்கனவே நேபாளத்தில் வெள்ளத்தால் பாதிக்கப்பட்ட தமிழர்களுக்கு உதவ தமிழக அரசின் அயலக தமிழர் நலத்துறை சார்பில் 24 மணி நேரமும் செயல்படும் அவசர உதவி எண்கள் அறிவிக்கப்பட்டு, மீட்புப் பணிகள் தொடர்ந்து கண்காணிக்கப்பட்டு வருவது குறிப்பிடத்தக்கது.