இரயில்வே திட்டப்பணிகளை வேகப்படுத்துங்க... கலெக்டர்களுக்கு தமிழக அரசு அறிவுறுத்தல்!

தமிழகத்தில் நிலுவையில் உள்ள பல்வேறு மத்திய அரசு மற்றும் இரயில்வே திட்டப்பணிகளை விரைந்து முடிக்கத் தமிழக அரசு தீவிர நடவடிக்கைகளை மேற்கொண்டு வருகிறது. இதன் ஒரு பகுதியாக, நிலம் கையகப்படுத்துதல் உள்ளிட்ட பணிகளில் உள்ள சுணக்கங்களைத் தவிர்க்கும்படி   அனைத்து மாவட்ட ஆட்சியர்களுக்கும் தலைமைச் செயலாளர் மூலமாக முக்கிய அறிவுறுத்தல்கள் வழங்கப்பட்டுள்ளன. திட்டங்களுக்கான நிலங்களை முறையாகவும் விரைவாகவும் ஒப்படைக்க வேண்டியதன் அவசியத்தை அரசு வலியுறுத்தியுள்ளது.

குறிப்பாகத் திண்டிவனம் - நகரி, சென்னை - கன்னியாகுமரி இருவழிப்பாதை மற்றும் பல்வேறு புதிய  வழித்தடங்களுக்கான நிலம் கையகப்படுத்தும் பணிகள் குறித்து இந்த உத்தரவில் விரிவாகக் கூறப்பட்டுள்ளது. நில உரிமையாளர்களுக்கு வழங்கப்பட வேண்டிய இழப்பீட்டுத் தொகையைச் சரியான நேரத்தில் வழங்கி, சட்ட ரீதியான சிக்கல்களைத் தீர்க்க ஆட்சியர்கள் முன்னுரிமை அளிக்க வேண்டும் என உத்தரவிடப்பட்டுள்ளது. அதிகாரிகளுடன் மாவட்ட நிர்வாகம் தொடர்ந்து ஒருங்கிணைந்து கூட்டங்களை நடத்தவும் அறிவுறுத்தப்பட்டுள்ளது.

பொதுமக்களின் போக்குவரத்துத் தேவைகளைப் பூர்த்தி செய்யும் இத்தகைய முக்கிய உள்கட்டமைப்புத் திட்டங்கள் காலதாமதமின்றி முடிவடைவதை ஆட்சியர்கள் உறுதி செய்ய வேண்டும் என அரசு திட்டவட்டமாகக் குறிப்பிட்டுள்ளது. வனத்துறை அனுமதி மற்றும் பிற அரசுத் துறைகளின் ஒப்புதல்களைப் பெறுவதில் உள்ள தடைகளையும் உடனுக்குடன் களைய சிறப்பு அதிகாரிகள் நியமிக்கப்பட உள்ளனர். இந்த புதிய உத்தரவின் மூலம் தமிழகத்தில் நீண்ட நாட்களாகத் தாமதமாகி வந்த   பணிகள் இனி வேகம் பெறும் என எதிர்பார்க்கப்படுகிறது.