கிழக்கு ஆப்பிரிக்க நாடான தான்சானியாவில், பயணிகள் பஸ் மீது மரக்கட்டைகளை ஏற்றிச் சென்ற லாரி மோதியதில் ஏற்பட்ட தீ விபத்தில் குறைந்தது 28 பேர் உயிரிழந்தனர். இந்தச் சம்பவம் பெரும் சோகத்தை ஏற்படுத்தியுள்ளது.தான்சானியாவின் டர் எஸ் சலாம் நகரில் இருந்து எம்பெயா நகரை நோக்கி வெள்ளிக்கிழமை அதிகாலை பயணிகள் பஸ் சென்றுகொண்டிருந்தது. மொரோகொரோ – டர் எஸ் சலாம் நெடுஞ்சாலையில் உள்ள ம்கம்பரானி பகுதியில் சென்றபோது, எதிரே வந்த மரக்கட்டைகள் ஏற்றிய லாரியுடன் பஸ் நேருக்கு நேர் மோதியதாகத் தகவல்கள் தெரிவிக்கின்றன.

மோதிய வேகத்தில் பஸ் தீப்பற்றி எரிந்தது. தீ வேகமாகப் பரவியதால் பஸ் முழுவதுமாக எரிந்து சேதமடைந்தது. இந்த விபத்தில் பஸ்சில் பயணித்த 27 பேர் மற்றும் லாரியில் இருந்த ஒருவர் என மொத்தம் 28 பேர் உயிரிழந்ததாக அதிகாரிகள் தெரிவித்துள்ளனர்.

விபத்தில் காயமடைந்தவர்களில் சிலர் மீட்கப்பட்டு மருத்துவமனையில் அனுமதிக்கப்பட்டுள்ளனர். காயமடைந்தவர்களின் மொத்த எண்ணிக்கை குறித்த முழுமையான விவரங்கள் முதற்கட்ட தகவல்களில் வெளியாகவில்லை.

லாரி ஓட்டுநர் மற்ற வாகனங்களை முந்திச் செல்ல முயன்றபோது, எதிரே வந்த பஸ்சுடன் மோதல் ஏற்பட்டிருக்கலாம் என முதற்கட்ட விசாரணையில் தெரிவிக்கப்பட்டுள்ளது. இருப்பினும், விபத்துக்கான முழுமையான காரணம் குறித்து அதிகாரிகள் தொடர்ந்து விசாரணை நடத்தி வருகின்றனர்.

விபத்தில் உயிரிழந்தவர்களை அடையாளம் காண்பதிலும் சிக்கல் ஏற்பட்டுள்ளதாக உள்ளூர் ஊடகங்கள் தெரிவித்துள்ளன. உடல்கள் கடுமையாகத் தீக்காயமடைந்துள்ளதால், சிலரின் அடையாளத்தை உறுதிப்படுத்த டிஎன்ஏ பரிசோதனை மேற்கொள்ளப்படலாம் எனத் தகவல்கள் வெளியாகியுள்ளன.

தான்சானியாவில் நிகழ்ந்த இந்தக் கோர விபத்து அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.