அமெரிக்காவில் கிரீன் கார்டு நடைமுறைகளுக்குக் கட்டுப்பாடுகள் விதிக்கப்பட்டுள்ள நிலையில், அடுத்த 5 ஆண்டுகளில் அங்கு கூடுதலாக 15,000 பேரை வேலைக்கு அமர்த்தும் திட்டத்தில் மாற்றமில்லை என்று இந்தியாவின் முன்னணி தகவல் தொழில்நுட்ப நிறுவனமான டாடா கன்சல்டன்சி சர்வீசஸ் (TCS) தெரிவித்துள்ளது.

அமெரிக்க அரசின் புதிய நடவடிக்கை தங்களது பணியாளர் திட்டத்தையோ, வாடிக்கையாளர் உறவுகளையோ பாதிக்காது என்றும் நிறுவனம் விளக்கம் அளித்துள்ளது.

View this post on Instagram

A post shared by Startup | Marketing (@marketing.growmatics)

8 நிறுவனங்கள் மீது அமெரிக்கா நடவடிக்கை

அமெரிக்க தொழிலாளர் துறை, நிரந்தரக் குடியுரிமை பெறுவதற்கான கிரீன் கார்டு நடைமுறையில் முக்கியப் பங்கு வகிக்கும் PERM எனப்படும் தொழிலாளர் சான்றிதழ் திட்டத்தில் இருந்து TCS உள்ளிட்ட 8 தொழில்நுட்ப நிறுவனங்களின் விண்ணப்பங்களை இடைநிறுத்தியுள்ளது.

இந்த நடவடிக்கையால் TCS, இன்ஃபோசிஸ், விப்ரோ, HCL, காக்னிசன்ட், மைக்ரோசாப்ட், அடோப் மற்றும் கேப்ஜெமினி ஆகிய நிறுவனங்களில் பணிபுரியும் சில வெளிநாட்டுத் தொழிலாளர்களின் நிரந்தரக் குடியுரிமை விண்ணப்ப நடைமுறைகள் தாமதமாகலாம்.

5 ஆண்டுகளில் 15,000 பேருக்கு வேலை

இதுகுறித்து TCS நிறுவனம் வெளியிட்டுள்ள விளக்கத்தில், அமெரிக்காவின் உத்தரவுகளுக்கு இணங்கச் செயல்படுவோம் என்று தெரிவித்துள்ளது.

அமெரிக்காவில் கடந்த இரண்டு ஆண்டுகளாகத் தங்களது PERM விண்ணப்பங்கள் ஒற்றை இலக்க எண்ணிக்கையிலேயே இருந்ததாக நிறுவனம் குறிப்பிட்டுள்ளது. எனவே, இந்த இடைநிறுத்தம் தங்களது பணியாளர் திட்டத்தையோ, வாடிக்கையாளர் சேவைகளையோ பாதிக்கும் என்று எதிர்பார்க்கவில்லை எனத் தெரிவித்துள்ளது.

மேலும், அமெரிக்காவில் உள்ள 31 அலுவலகங்கள் மற்றும் சேவை மையங்களில் உள்ளூர் பணியாளர்களை நியமிப்பதற்கு முக்கியத்துவம் அளித்து வருவதாகவும் நிறுவனம் கூறியுள்ளது. இதன் தொடர்ச்சியாக, அடுத்த ஐந்து ஆண்டுகளில் கூடுதலாக 15,000 பேரை அமெரிக்காவில் பணியமர்த்தத் திட்டமிட்டுள்ளது.

இந்திய ஐ.டி. ஊழியர்களுக்கு என்ன பாதிப்பு?

PERM நடைமுறை என்பது தகுதியுள்ள வெளிநாட்டுப் பணியாளர்களுக்கு நிறுவனங்கள் வேலைவாய்ப்பு அடிப்படையில் நிரந்தரக் குடியுரிமை பெற உதவும் முக்கியமான படியாகும். இந்தத் திட்டத்தில் விண்ணப்பங்கள் இடைநிறுத்தப்படுவதால், அதனைச் சார்ந்துள்ள சில ஊழியர்களின் கிரீன் கார்டு நடைமுறைகள் பாதிக்கப்படலாம்.

ஆனால், இந்த நடவடிக்கை ஏற்கெனவே வழங்கப்பட்டுள்ள H-1B விசாக்களையோ கிரீன் கார்டுகளையோ தானாகவே ரத்து செய்வதாகாது. பாதிப்பு ஒவ்வொரு ஊழியரின் விண்ணப்ப நிலையைப் பொறுத்து மாறுபடலாம்.

அமெரிக்காவில் உள்ளூர் பணியாளர்களை அதிக அளவில் நியமிக்கும் திட்டத்தைத் தொடர்வதாக TCS தெரிவித்துள்ளதால், அந்நாட்டில் வேலைவாய்ப்புகளை உருவாக்கும் அதன் திட்டம் தொடர்ந்து முன்னெடுக்கப்படும் என எதிர்பார்க்கப்படுகிறது.