மருத்துவமனையில் பரபரப்பு.. சூர்யா பேனரை அகற்றச் சொன்ன போலீசாருடன் ரசிகர்கள் வாக்குவாதம்!

நடிகர் சூர்யாவின் பிறந்தநாளை முன்னிட்டு சென்னை ராஜீவ்காந்தி அரசு பொது மருத்துவமனையில் ரசிகர்கள் நடத்திய ரத்ததான முகாமின் போது, பேனரை அகற்றுவது தொடர்பாகப் போலீசாருக்கும் ரசிகர்களுக்கும் இடையே ஏற்பட்ட திடீர் வாக்குவாதம் அப்பகுதியில் சிறிது நேரம் பெரும் பரபரப்பை ஏற்படுத்தியது.

நடிகர் சூர்யாவின் பிறந்தநாள் வரும் ஜூலை 23-ம் தேதி கொண்டாடப்பட உள்ளது. இதனை முன்னிட்டு, அவரது நற்பணி மன்ற ரசிகர்கள் ஆண்டுதோறும் பல்வேறு நலத்திட்ட உதவிகளையும், சமூக சேவைப் பணிகளையும் செய்வது வழக்கம். அந்த வகையில், சென்னை ராஜீவ்காந்தி அரசு பொது மருத்துவமனையில் சூர்யா ரசிகர்கள் சார்பில் இன்று காலை சிறப்பு ரத்ததான முகாம் ஒன்றுக்கு ஏற்பாடு செய்யப்பட்டிருந்தது. இதில்  ரசிகர்கள் கலந்து கொண்டு ரத்ததானம் செய்து வந்தனர்.

இந்த முகாமையொட்டி, மருத்துவமனை வளாகத்தின் முக்கியப் பகுதியில் நடிகர் சூர்யாவின் பிரம்மாண்ட பேனர் மற்றும் போஸ்டர்களை ரசிகர்கள் ஒட்டியிருந்தனர். மருத்துவமனை வளாகத்திற்குள் இதுபோன்று அரசியல் அல்லது சினிமா தொடர்பான பேனர்களை வைப்பதற்கு அனுமதி இல்லை என்று கூறி, அங்கிருந்த பாதுகாப்புக் காவலர்கள் மற்றும் போலீசார் அந்தப் பேனரை உடனடியாக அகற்றுமாறு ரசிகர்களிடம் அறிவுறுத்தினர்.

இதற்குக் கடும் எதிர்ப்புத் தெரிவித்த சூர்யா ரசிகர்கள், "நாங்கள் எந்தவொரு விளம்பர நோக்கத்திற்காகவும் இதைச் செய்யவில்லை, நற்பணியான ரத்ததான முகாம் நடப்பதை மற்றவர்கள் அறிந்துகொள்ளவே இந்த பேனரை வைத்துள்ளோம்" என்று கூறி போலீசாருடன் காரசாரமான வாக்குவாதத்தில் ஈடுபட்டனர்.

ரசிகர்கள் பேனரை அகற்ற மறுத்துப் போலீசாருடன் தொடர்ந்து மல்லுக்கட்டியதால், மருத்துவமனைக்கு வந்த பிற நோயாளிகள் மற்றும் பொதுமக்களிடையே என்ன நடக்கிறது என்ற குழப்பமும், லேசான சலசலப்பும் ஏற்பட்டது.

இதனைத் தொடர்ந்து, அங்கு வந்த மூத்த காவல் அதிகாரிகள் ரசிகர்களைச் சமாதானப்படுத்தி, மருத்துவமனை விதிமுறைகளை எடுத்துக் கூறிப் பேச்சுவார்த்தை நடத்தினர். அதிகாரிகளின் விளக்கத்தை ஏற்றுக்கொண்ட ரசிகர்கள், பின்னர் அங்கிருந்து பேனரைத் தாங்களாகவே அகற்றிக் கொண்டனர். இதனால் அங்கு நிலவி வந்த பரபரப்பான சூழல் தற்காலிகமாக முடிவுக்கு வந்தது.