திருச்சியில் பயங்கரம்... கஞ்சா புகைப்பதைத் தட்டிக்கேட்ட இருவருக்கு அரிவாள் வெட்டு!

திருச்சி கொட்டப்பட்டு பகுதியில் கஞ்சா புகைத்துக் கொண்டிருந்த போதைக் கும்பலைத் தட்டிக்கேட்ட அதே பகுதியைச் சேர்ந்த இரு வாலிபர்கள், அரிவாளால் கொடூரமாக வெட்டப்பட்ட சம்பவம் அப்பகுதியில் பெரும் பரப்பரப்பையும் அதிர்ச்சியையும் ஏற்படுத்தியுள்ளது.

திருச்சி கொட்டப்பட்டு பகுதியில் உள்ள ஒரு பொது இடத்தில், ஒரு கும்பல் சட்டவிரோதமாகக் கஞ்சா புகைத்துக் கொண்டு போதையில் மிதந்துள்ளது. அப்போது அந்த வழியாகச் சென்ற அதே பகுதியைச் சேர்ந்த நாகராஜ் மற்றும் ஜெகன் ஆகிய இரு வாலிபர்கள், பொது இடத்தில் கஞ்சா புகைக்கக் கூடாது என அந்தப் போதைக் கும்பலைத் தட்டிக்கேட்டு எச்சரித்துள்ளனர். இதனால் கடுமையான ஆத்திரமடைந்த அந்தப் போதைக் கும்பல், நாகராஜ் மற்றும் ஜெகனுடன் வாக்குவாதத்தில் ஈடுபட்டுள்ளது. வாக்குவாதம் முற்றவே, தாங்கள் மறைத்து வைத்திருந்த அரிவாளை எடுத்து இருவரையும் கொடூரமாக வெட்ட முயன்றது. இதனால் உயிருக்கு அஞ்சி ஓடிய இருவரையும் அந்தப் போதைக் கும்பல் நடுரோட்டில் ஓட ஓட விரட்டி, அரிவாளால் கொடூரமாக வெட்டிவிட்டுத் தப்பியோடியது.

கொடூர வெட்டுக் காயங்களுடன் இரத்த வெள்ளத்தில் சரிந்த நாகராஜ் மற்றும் ஜெகன் ஆகிய இருவரையும், அக்கம் பக்கத்தினர் மீட்டுச் சிகிச்சைக்காகத் திருச்சி அரசு பொது மருத்துவமனைக்கு அவசர அவசரமாக அனுப்பி வைத்தனர். அங்கு அவர்களுக்குத் தீவிர சிகிச்சை அளிக்கப்பட்டு வருகிறது.

காவல்துறை நடவடிக்கை: இச்சம்பவம் குறித்துத் தகவல் அறிந்த போலீசார் உடனடியாக சம்பவ இடத்திற்கு விரைந்து வந்து விசாரணை நடத்தினர். மேலும், இதுகுறித்து முறைப்படி வழக்குப் பதிவு செய்த போலீசார், பொதுமக்களை அச்சுறுத்திவிட்டுத் தலைமறைவாக உள்ள அந்த ஆபத்தான கஞ்சா போதைக் கும்பலைத் தனிப்படைகள் அமைத்துத் தீவிரமாகத் தேடி வருகின்றனர்.