ஆப்கானிஸ்தானுக்கு எதிரான டெஸ்ட்.. இந்தியா பேட்டிங் தேர்வு; இளம் சுழற்பந்து வீச்சாளர் மானவ் சுதார் அறிமுகம்!

இந்தியா மற்றும் ஆப்கானிஸ்தான் அணிகளுக்கு இடையேயான வரலாற்றுச் சிறப்புமிக்க ஒரே ஒரு போட்டி கொண்ட டெஸ்ட் கிரிக்கெட் போட்டி, நியூ சண்டிகரின் முல்லன்பூரில் உள்ள பிரம்மாண்ட புதிய மைதானத்தில் இன்றுகாலை தொடங்கியது. இப்போட்டியில் டாஸ் வென்ற இந்திய அணியின் புதிய இளம் கேப்டன் சுப்மன் கில்முதலில் பேட்டிங் செய்வதாக அதிரடியாக அறிவித்துள்ளார்.

இந்திய கிரிக்கெட் அணி தனது 2026-ஆம் ஆண்டின் முதல் ரெட்-பால் டெஸ்ட் சவாலை இன்று எதிர்கொள்கிறது. நியூ சண்டிகரில் புதிதாகக் கட்டப்பட்டுள்ள 'மகாராஜா யாதவிந்திர சிங் சர்வதேச கிரிக்கெட் மைதானம்'  இந்தியாவின் புதிய டெஸ்ட் வேனியுவாக இன்று முறைப்படி அரங்கேறியுள்ளது.

இப்போட்டியில் இந்திய அணியை இளம் நட்சத்திரம் சுப்மன் கில் கேப்டனாகவும், கே.எல்.ராகுல் துணை கேப்டனாகவும் வழிநடத்துகின்றனர். தலைமைப் பயிற்சியாளர் கௌதம் கம்பீரின் புதிய வியூகங்களின் கீழ் இந்திய இளம் படை களம் காண்கிறது.

ரவிச்சந்திரன் அஸ்வின் மற்றும் ரவீந்திர ஜடேஜா ஆகிய இரு மூத்த சுழற்பந்து வீச்சாளர்களும் இல்லாத நிலையில், இந்திய அணியின் 319-வது டெஸ்ட் வீரராக ராஜஸ்தானைச் சேர்ந்த 23 வயது இளம் இடதுகை சுழற்பந்து வீச்சாளரான மானவ் சுதார் இன்று முறைப்படி அறிமுகமாகியுள்ளார்.

அவருக்கு இந்திய அணியின் சீனியர் ஸ்பின்னர் குல்தீப் யாதவ் டெஸ்ட் கேப்பினை வழங்கி வாழ்த்தினார். உள்நாட்டுப் போட்டிகள் மற்றும் அண்மைய ஐபிஎல் தொடர்களில் அசத்திய மானவ் சுதார், ஹர்ஷ் துபேயை முந்தி இன்றைய ஆடும் லெவனில்  இடம் பிடித்துள்ளார்.

இந்திய அணியின் தொடக்க வீரர்களாகத் அதிரடி ஜோடி கே.எல்.ராகுல் மற்றும் யஷஸ்வி ஜெய்ஸ்வால் ஆகியோர் களம் இறங்குகின்றனர். 3-வது வரிசையில் சாய் சுதர்சனும், 4-வது வரிசையில் கேப்டன் சுப்மன் கில்லும் விளையாட உள்ளனர். விக்கெட் கீப்பராக ரிஷப் பண்ட் மற்றும் துருவ் ஜூரெல் ஆகிய இருவருமே ஆடும் லெவனில் சேர்க்கப்பட்டுள்ளது அணிக்கு கூடுதல் பலம் சேர்த்துள்ளது.

சுழற்பந்து வீச்சில் அறிமுக வீரர் மானவ் சுதாருடன் இணைந்து குல்தீப் யாதவ் மற்றும் ஆல்-ரவுண்டர் வாஷிங்டன் சுந்தர் ஆகியோர் களம் காண்கின்றனர். வேகப்பந்து வீச்சு கூட்டணியை முகமது சிராஜ் மற்றும் பிரசித் கிருஷ்ணா ஆகியோர் முன்னின்று வழிநடத்த உள்ளனர்.

கே.எல்.ராகுல், யஷஸ்வி ஜெய்ஸ்வால், பி.சாய் சுதர்சன், சுப்மன் கில் (கேப்டன்), ரிஷப் பண்ட் (விக்கெட் கீப்பர்), துருவ் ஜூரெல், வாஷிங்டன் சுந்தர், மானவ் சுதார், குல்தீப் யாதவ், முகமது சிராஜ், பிரசித் கிருஷ்ணா.

டாஸ் வென்று முதலில் பேட்டிங் செய்ய களம் இறங்கியுள்ள இந்திய அணி, ஆப்கானிஸ்தானின் பந்துவீச்சை எதிர்கொண்டு முதல் இன்னிங்ஸில் ஒரு இமாலய ரன் குவிப்பை எட்டத் திட்டமிட்டுள்ளது. இதனால் இன்றைய ஆட்டம் ரசிகர்களிடையே பெரும் சுவாரசியத்தை ஏற்படுத்தியுள்ளது.