கூட்டணி கட்சிகள் அதிருப்தி... இடைத்தேர்தல் பிரச்சாரத்தில் அடுத்தடுத்து சொதப்பும் தவெக!

தமிழகத்தில் நடைபெறவுள்ள இடைத்தேர்தல் களத்தில், தமிழக வெற்றிக் கழகத்தின் தேர்தல் உத்திகள் மற்றும் பரப்புமுறை குறித்துக் கூட்டணி கட்சிகளிடையே அதிருப்தி எழுந்துள்ளதாகத் தகவல்கள் வெளியாகியுள்ளன.

தவெக கூட்டணியில் இடம்பெற்றுள்ள காங்கிரஸ், விசிக உள்ளிட்ட கட்சிகளைச் சேர்ந்த முக்கியப் பிரமுகர்கள் மற்றும் தொண்டர்கள் சிலர் அதிருப்தியில் உள்ளதாகக் கூறப்படுகிறது. இடைத்தேர்தல் பரப்புரையின் போது தங்களுக்கு உரிய முக்கியத்துவம் வழங்கப்படவில்லை என்றும், தவெக தலைவர் விஜய்யுடன் ஒரே மேடையில் இணைந்து பரப்புரை செய்ய அனுமதி மறுக்கப்பட்டுள்ளதாகவும் அவர்கள் வேதனை தெரிவிக்கின்றனர்.

கூட்டணி கட்சிகளை ஒரே மேடையில் ஏற்றி பரப்புரை செய்தால், தவெக வேட்பாளர்கள் வெற்றி பெறும் பட்சத்தில், "கூட்டணி பலத்தினால்தான் அந்த வெற்றி கிடைத்தது" என்ற பேச்சு எழுந்துவிடக் கூடாது என்பதற்காகவே இந்தத் தவிர்க்கும் போக்குக் கடைபிடிக்கப்படுவதாக அரசியல் வட்டாரங்களில் பேசப்படுகிறது.

தேர்தல் களத்தில் பிரதானமாகத் தங்களது பலத்தைக் காட்ட நினைக்கும் தவெக தலைமை, கூட்டணி கட்சிகளை ஓரங்கட்டுவது போன்ற இந்த அணுகுமுறை வரவிருக்கும் நாட்களில் தேர்தல் களத்தில் எத்தகைய தாக்கத்தை ஏற்படுத்தும் என்ற எதிர்பார்ப்பு அரசியல் அரங்கில் எழுந்துள்ளது.