கடன் சுமை தீரும்.. சந்திர தோஷம் விலகும்... அகால மரணம் சம்பவிக்காது... சித்ரா பௌர்ணமி வழிபாடு பலன்கள்!

சித்ரா பௌர்ணமி தினமான இன்று அதிகாலையில் எழுந்து புண்ணிய நதிகளில் அல்லது வீட்டில் நீராடி விரதத்தைத் தொடங்க வேண்டும். இல்லத்து பூஜை அறையில் சித்ரகுப்தரின் திருவுருவப் படத்திற்குச் செவ்வரளி மற்றும் மல்லிகை மலர்களால் அர்ச்சனை செய்வது சிறப்பு.

அவருக்குப் பிடித்தமான நைவேத்தியமாக உப்பில்லாத தயிர் சாதம், சர்க்கரைப் பொங்கல் அல்லது சித்ரான்னங்களை (எலுமிச்சை, புளி சாதம்) படைக்கலாம். குறிப்பாக இன்று பேனா மற்றும் நோட்டுப் புத்தகத்தை வைத்து, "இனி வரும் காலங்களில் நற்செயல்களை மட்டுமே செய்வேன்" என்று உறுதிமொழி எடுத்துக்கொண்டு சித்ரகுப்தரை மனதார வழிபட வேண்டும்.

இந்நாளின் மிகப்பெரிய சிறப்பம்சம் நிலவு வழிபாடு ஆகும். மாலையில் சந்திரன் உதயமாகும் வேளையில், மொட்டை மாடியில் அல்லது வெட்டவெளியில் நிலவின் ஒளியில் அமர்ந்து குடும்பத்துடன் 'நிலாச் சோறு' உண்பது மிகவும் விசேஷம். சந்திரனின் ஒளிக்கதிர்கள் உடலில் படுவது மன அழுத்தத்தைக் குறைத்து ஆரோக்கியத்தைத் தரும் என்பது அறிவியல் பூர்வமான நம்பிக்கையாகும்.

மதுரை வைகை ஆற்றில் அழகர் இறங்கும் வைபவமும், திருவண்ணாமலையில் லட்சக்கணக்கான பக்தர்கள் கிரிவலம் செல்வதும் இந்நாளின் மிக முக்கியமான சிறப்புகளாகும். இன்று ஏழை எளியவர்களுக்கு அன்னதானம் செய்வதும், குறிப்பாகக் குடை மற்றும் செருப்பு தானம் செய்வதும் பித்ருக்களின் ஆசியைப் பெற்றுத் தரும்.

சித்ரா பௌர்ணமி வழிபாட்டின் மூலம் ஒருவருடைய ஜாதகத்தில் உள்ள சந்திர தோஷங்கள் நீங்கி மன உறுதி மேம்படும். சித்ரகுப்தரை வழிபடுவதால் தீய எண்ணங்கள் மறைந்து நற்பண்புகள் வளரும் என்பதுடன், விபத்துக்கள் மற்றும் அகால மரண பயத்திலிருந்து விடுதலை கிடைக்கும். குடும்பத்தில் நிலவும் கடன் சுமைகள் மற்றும் வறுமை நீங்கிப் பொருளாதார முன்னேற்றம் ஏற்படும். மாணவர்கள் இன்று நோட்டுப் புத்தகத்தை வைத்து வழிபடுவதால் கல்வி மற்றும் ஞானத்தில் சிறந்து விளங்குவார்கள். மொத்தத்தில் இந்த வழிபாடு நமது கர்ம வினைகளைக் குறைத்து, வாழ்க்கையில் அமைதியையும் வளத்தையும் அள்ளித் தரும் ஒரு அருமருந்தாகும்.