“பழம் நழுவவில்லை; பாலில் விழவில்லை… பாதாளத்தில் தள்ளிவிட்டார்கள்!” – நாஞ்சில் சம்பத்!

தமிழக அரசியல் வட்டாரத்தில் கூட்டணி அமைப்புகள் குறித்து மீண்டும் பரபரப்பு ஏற்பட்டுள்ளது. தி.மு.க.–தே.மு.தி.க. இணைப்பு குறித்து கருத்து தெரிவித்துள்ள நாஞ்சில் சம்பத், தனது எக்ஸ் (X) தள பதிவில் கடும் விமர்சனங்களை முன்வைத்துள்ளார்.

தி.மு.க.வில் நான் சைக்கிள் கூட கேட்டதில்லை; கேட்டாலும் கிடைக்காது என முன்பே கூறியிருந்த அவர், இம்முறை கூட்டணியை நோக்கி சாடும் வகையில், “பழம் நழுவவில்லை; பாலில் விழவில்லை. பாதாளத்தில் தள்ளிவிடப்பட்டிருக்கிறது” என்று குறிப்பிட்டுள்ளார். இந்த உவமை அரசியல் வட்டாரங்களில் பெரும் விவாதத்தை ஏற்படுத்தியுள்ளது.

அவர் தனது பதிவில், இது ஒரு இயல்பான கூட்டணி அல்ல; “உள்குத்து விளையாடும் குஸ்தி அணி” போல உள்ளது என விமர்சித்துள்ளார். கூட்டணிக்கான குழு இன்னும் செயல்படத் தொடங்குவதற்கும் முன்பே குழப்பங்கள் வெளிப்படுவதாகவும், அதனால் அணி உள்ளேயே நிலைதடுமாறல் ஏற்பட்டுள்ளதாகவும் தெரிவித்துள்ளார்.

மேலும், “யார் இருப்பார், யார் தாவுவார் எனத் தெரியாமல் அச்சத்தில் அலறுகிறார்கள்” என்று குறிப்பிட்ட அவர், கூட்டணிக்குள் இருக்கும்வர்கள் தங்களின் அரசியல் நிலையை எண்ணிக் கவலைப்படுகின்றனர் என சாடியுள்ளார். இடஒதுக்கீடு மற்றும் பொறுப்புகள் குறித்த உள்மனப்போக்குகள் வெளிப்படுவதாகவும், அதனை கையாள முடியாத நிலை ஏற்பட்டுள்ளதாகவும் அவர் குற்றஞ்சாட்டியுள்ளார்.

“இடஒதுக்கீட்டை நாங்கள்தான் கண்டுபிடித்தோம் எனப் பெருமை பேசுபவர்கள், கூட்டணி ஒதுக்கீட்டையே சமாளிக்க முடியாமல் தவிக்கிறார்கள்” என்ற அவரது குறிப்பு அரசியல் விமர்சகர்களின் கவனத்தை ஈர்த்துள்ளது. கூட்டணிக் கட்சிகள் ஒருவரை ஒருவர் ஒதுக்கும் நிலை உருவாகியுள்ளது என்றும், இது சமூக நீதி என்ற பெயரில் நடைபெறுவது சரியா என்ற கேள்வியையும் எழுப்பியுள்ளார்.

மொத்தத்தில், தி.மு.க.–தே.மு.தி.க. இணைப்பை “பாழுங்கிணறு” என வர்ணித்துள்ள நாஞ்சில் சம்பத், இந்த கூட்டணி எதிர்காலத்தில் நிலைத்திருக்குமா என்ற சந்தேகத்தையும் தனது பதிவின் மூலம் வெளிப்படுத்தியுள்ளார்.