கொடூரமாக பாலியல் படுகொலை செய்யப்பட்ட மருத்துவ மாணவியின் தாயார் வெற்றி... 56,000 வாக்குகள் முன்னிலை!

மேற்கு வங்க மாநில சட்டமன்றத் தேர்தல் வாக்கு எண்ணிக்கையில் பாரதிய ஜனதா கட்சி (பாஜக) ஒரு மிகப்பெரிய அரசியல் புரட்சியை ஏற்படுத்தியுள்ளது. கடந்த 2024-ம் ஆண்டு கொல்கத்தா ஆர்.ஜி. கர் மருத்துவமனையில் கொடூரமான முறையில் பலாத்காரம் செய்யப்பட்டு கொலை செய்யப்பட்ட பயிற்சி மருத்துவ மாணவியின் தாயார் ரத்னா தேப்நாத், இத்தேர்தலில் பாஜக சார்பில் பனிஹாடி தொகுதியில் போட்டியிட்டார். தற்போது நிலவரப்படி, அவர் தனது எதிரணி வேட்பாளரை விடச் சுமார் 56,000 வாக்குகள் வித்தியாசத்தில் பலமான முன்னிலை பெற்று வெற்றியை உறுதி செய்துள்ளார்.

தனது மகளின் மரணத்திற்கு நீதி கேட்டு நாடு தழுவிய அளவில் போராட்டங்கள் வெடித்த நிலையில், பாதிக்கப்பட்ட மாணவியின் தாயார் தேர்தல் களத்தில் இறங்கியது ஒட்டுமொத்த மேற்கு வங்காளத்தையும் கவனிக்க வைத்தது. முன்னாள் மத்திய அமைச்சர் ஸ்மிருதி இரானி முன்னிலையில் வேட்புமனு தாக்கல் செய்த ரத்னா தேப்நாத்திற்கு, மக்கள் தங்களது வாக்குகளின் வாயிலாக மிகப்பெரிய ஆதரவை வெளிப்படுத்தியுள்ளனர். ஒரு தாயின் நீதிக்கான போராட்டத்திற்குத் தொகுதி மக்கள் அளித்துள்ள இந்த அங்கீகாரம், திரிணாமுல் காங்கிரஸ் அரசுக்கு விழுந்த மிகப்பெரிய அடியாகக் கருதப்படுகிறது.

மாநிலம் முழுவதும் உள்ள மற்ற தொகுதிகளிலும் பாஜக அசுர பலத்துடன் முன்னிலை வகித்து வருகிறது. ஆளுங்கட்சியான திரிணாமுல் காங்கிரஸின் கோட்டைகளைத் தகர்த்து, பாஜக தற்போது 200-க்கும் மேற்பட்ட தொகுதிகளில் முன்னிலை பெற்று ஆட்சியமைக்கும் சூழலை எட்டியுள்ளது. மம்தா பானர்ஜியின் ஆட்சிக்கு எதிரான மக்களின் அதிருப்தியும், நீதிக்கான போராட்டமும் தேர்தல் முடிவுகளில் எதிரொலித்துள்ளன. மேற்கு வங்கத்தில் ஒரு மிகப்பெரிய ஆட்சி மாற்றத்திற்கான அறிகுறிகள் தென்படுவதால், பாஜக தொண்டர்கள் மாநிலம் முழுவதும் வெற்றிக் கொண்டாட்டங்களில் மிக உற்சாகமாக ஈடுபட்டு வருகின்றனர்.