இன்று அதிகாலை திருப்பதியில் நவராத்திரி பிரம்மோற்சவம் தொடங்கியது... லட்சக்கணக்கில் குவிந்த பக்தர்கள்!

திருப்பதி ஏழுமலையான் கோயிலில் நவராத்திரி பிரம்மோற்சவ விழா இன்று அக்டோபர் 12ம் தேதி முதல் 20-ஆம் தேதி வரை 9 நாட்கள் வெகு விமரிசையாக நடைபெற உள்ள நிலையில், விழாவின் தொடக்க நிகழ்வான அங்குரார்ப்பணம் நேற்றிரவு கோலாகலமாக நடைபெற்றது. 

நவராத்திரி பிரம்மோற்சவத்தின் முதல் நிகழ்வாக நேற்று இரவு கோயில் மாட வீதிகளில் விஸ்வக்சேனர் தங்கத் திருச்சி வாகனத்தில் ஊர்வலமாக வந்து பக்தர்களுக்குக் காட்சியளித்தார்.அதனைத் தொடர்ந்து, வசந்த மண்டபத்தில் புற்றுமண்ணில் 9 வகையான தானியங்கள் விதைக்கப்படும் பாரம்பரியச் சடங்கான 'பீஜவாபனம்' வைகானச ஆகம விதிகளின்படி சிறப்பாக நடத்தப்பட்டது.

அங்குரார்ப்பணத்தைத் தொடர்ந்து, இன்று அக்டோபர் 12-ம் தேதி முதல் பிரம்மோற்சவ விழா முறைப்படி தொடங்குகிறது. இதையொட்டி தினசரி காலை மற்றும் மாலை வேளைகளில் பல்வேறு வாகனங்களில் உற்சவர் மலையப்பா சுவாமி மாட வீதிகளில் உலா வந்து பக்தர்களுக்கு அருள்பாலிப்பார். 

விழாவையொட்டி திருப்பதியில் பலத்த பாதுகாப்பு ஏற்பாடுகளும், பக்தர்களுக்குத் தேவையான அடிப்படை வசதிகளும் தேவஸ்தானம் சார்பில் செய்யப்பட்டுள்ளன.