அடுத்த அதிர்ச்சி... தமிழகத்தில் 21 லட்சம் டன் பற்றாக்குறை... அரிசி விலை கிலோவுக்கு ரூ.7 வரை உயர்வு - பொதுமக்கள் அவதி!

தமிழகத்தில் ஏழை மற்றும் நடுத்தர குடும்பங்களின் மாதாந்திர பட்ஜெட்டைப் பதம் பார்க்கும் வகையில் அரிசி விலை கிலோவுக்குச் ரூ.7 வரை உயர்ந்துள்ளது. அண்டை மாநில வரத்துக் குறைவு மற்றும் தமிழகத்தின் உள்நாட்டு உற்பத்திச் சரிவு ஆகியவையே இந்த விலை ஏற்றத்திற்குக் காரணமாகக் கூறப்படுகின்றன.

சென்னை கோயம்பேடு, திருச்சி, மதுரை மற்றும் ஈரோடு ஆகிய முக்கிய மொத்த விலை தானியச் சந்தைகளின் நடப்பு நிலவரங்களின்படி மொத்த சந்தையில் கடந்த வாரம் வரை ரூ.1,150-க்கு விற்கப்பட்ட 26 கிலோ எடையுள்ள சன்ன அரிசி மூட்டை, ஒரே வாரத்தில் ரூ.100 உயர்ந்து ரூ.1,250 ஆக அதிகரித்துள்ளது.

மொத்த சந்தையின் இந்த விலை உயர்வு சில்லறை மளிகைக் கடைகளிலும் எதிரொலிக்கத் தொடங்கியுள்ளது. ரகங்களைப் பொறுத்து கிலோவுக்கு ரூ.5 முதல் ரூ.7 வரை சில்லறை விற்பனை விலை உயர்ந்துள்ளதால், பொதுமக்கள் கடைகளில் அரிசி வாங்குவதற்குக் கூடுதல் தொகையைச் செலவிட வேண்டிய கட்டாயத்திற்கு ஆளாகியுள்ளனர்.

தமிழக உணவுப் பொருள் வழங்கல் துறை மற்றும் வணிகர் சங்கங்களின் கூட்டமைப்பு வெளியிட்டுள்ள முதற்கட்டப் பகுப்பாய்வுத் தரவுகளின்படி  தமிழகத்தில் கடந்த பருவமழைக் காலத்தில் நிலவிய போதிய நீரற்ற சூழலால், காவிரி டெல்டா மாவட்டங்கள் மற்றும் பிற மாவட்டங்களில் நெல் சாகுபடிப் பரப்பு கணிசமாகக் குறைந்தது. இதன் காரணமாக, மாநிலத்தின் ஒட்டுமொத்தத் தேவையை விடச் சுமார் 21 லட்சம் டன் அரிசி பற்றாக்குறை  நிலவுகிறது.

தமிழகத்தின் இந்த கூடுதல் தேவையைப் பூர்த்தி செய்ய ஆந்திரப் பிரதேசம் மற்றும் கர்நாடகா ஆகிய மாநிலங்களிலிருந்தே வழக்கமாக அரிசி வரவழைக்கப்படும். ஆனால்,  அந்த மாநிலங்களிலும் உள்நாட்டுத் தேவை அதிகரித்துள்ளதாலும், ஹார்முஸ் நீரிணை மூடப்பட்டதால் சர்வதேச அளவில் ஏற்பட்டுள்ள டீசல் விலை உயர்வால் லாரி வாடகை அதிகரித்துள்ளதாலும், தமிழகத்திற்கான அரிசி லாரிகளின் வரத்து பாதியாகக் குறைந்துள்ளது.

அரிசி விலை உயர்வால் நடுத்தரக் குடும்பங்கள் பெரும் சிரமத்திற்கு ஆளாகியுள்ளதை அடுத்து, தமிழக உணவு மற்றும் நுகர்வோர் பாதுகாப்புத்துறை அமைச்சகம் அவசர ஆலோசனைக் கூட்டத்தைக் கூட்டியுள்ளது.  பொது விநியோகத் திட்டத்தின் கீழ் இயங்கும் ரேஷன் கடைகள் மூலம் குடும்ப அட்டைதாரர்களுக்கு வழங்கப்படும் இலவச அரிசியின் தரத்தை உயர்த்தி, விநியோகத்தை தங்கு தடையின்றி வழங்க முதலமைச்சர் விஜய் அதிகாரிகளுக்கு உத்தரவிட்டுள்ளார்.

மேலும், பொதுச் சந்தையில் அரிசியைச் செயற்கையாகப் பதுக்கி வைத்து விலையேற்றத்தை உருவாக்கும் மொத்த வியாபாரிகளைக் கண்டறிந்து அவர்கள் மீது அத்தியாவசியப் பொருட்கள் சட்டத்தின் கீழ் கடுமையான நடவடிக்கை எடுக்கத் தாலுகா வாரியாகப் பறக்கும் படைகள் அமைக்கப்பட்டு வருகின்றன.