சுட்டெரிக்கும் வெயில்... பள்ளிகள் திறப்பு மீண்டும் தள்ளி வைப்பு?!

தமிழகத்தில் ஜூன் 4-ம் தேதி பள்ளிகள் திறக்கப்பட உள்ள நிலையில், மாநிலத்தின் பெரும்பாலான மாவட்டங்களில் வெயிலின் தாக்கம் சற்றும் குறையாமல் சுட்டெரித்து வருவதால், பள்ளிகள் திறப்பை மீண்டும் தள்ளி வைக்க வேண்டும் என்ற கோரிக்கை தற்போது வலுத்து வருகிறது. இந்த ஆண்டு நடைபெற்ற சட்டமன்றத் தேர்தல் காரணமாகப் பள்ளி மாணவர்களுக்கு வழக்கத்தை விடக் கூடுதல் நாட்கள் கோடை விடுமுறை கிடைத்திருந்தது.

கோடை விடுமுறை முடிந்து ஜூன் 1-ம் தேதி பள்ளிகள் திறக்கப்படும் என்று முதலில் அறிவிக்கப்பட்டிருந்தது. ஆனால், கத்தரி வெயில் முடிந்த பின்பும் தமிழகத்தில் வெயிலின் தாக்கம் குறையாததால், பள்ளிகள் திறப்பை ஜூன் 4-ம் தேதிக்குத் தள்ளி வைப்பதாகப் பள்ளிக்கல்வித்துறை அமைச்சர் ராஜ்மோகன் அதிகாரப்பூர்வமாக அறிவித்திருந்தார்.

தற்போது பள்ளிகள் திறப்பதற்கு இன்னும் இரண்டு நாட்களே உள்ள நிலையிலும், சென்னை உட்பட தமிழகத்தின் 14 மாவட்டங்களில் வெயிலின் அளவு இயல்பை விட 2 முதல் 3 டிகிரி செல்சியஸ் வரை அதிகமாகப் பதிவாகி வருகிறது. சென்னை மற்றும் பிற மாவட்டங்களில் பகல் நேரங்களில் கொளுத்தும் வெயிலால் வாகன ஓட்டிகள், முதியவர்கள், குழந்தைகள் கடுமையான அசௌகரியங்களுக்கு உள்ளாகி வருகின்றனர். இரவு நேரங்களிலும் உஷ்ணத்துடன் கூடிய புழுக்கம் நீடித்து வருகிறது.

தமிழகத்தில் தென்மேற்குப் பருவமழை இன்னும் சில நாட்களில் தொடங்க உள்ள போதிலும், தற்போதைய கடுமையான வெயில் மற்றும் புழுக்கமான சூழ்நிலையில் பள்ளிகளைத் திறந்தால் குழந்தைகள் அக்னி வெயிலின் தாக்கத்தால் உடல்நலக் குறைபாடுகளுக்கு ஆளாக நேரிடும் எனப் பெற்றோர்கள் மற்றும் கல்வியாளர்கள் கவலை தெரிவித்துள்ளனர். எனவே, பள்ளித் திறப்பை மேலும் ஒரு வார காலத்திற்கு ஒத்தி வைக்க வேண்டும் என்று அவர்கள் அரசிடம் வலியுறுத்தியுள்ளனர்.

சென்னை வானிலை ஆய்வு மையம் வரும் ஜூன் 7-ம் தேதி வரை தமிழகத்தில் பலத்த காற்றுடன் கூடிய கனமழைக்கு வாய்ப்புள்ளதாக ஒருபுறம் எச்சரிக்கை விடுத்துள்ள சூழலில், மறுபுறம் நீடித்து வரும் இந்த அக்னி வெயில் காரணமாகப் பள்ளிகள் திறப்பு மீண்டும் தள்ளிப் போகுமா? அல்லது திட்டமிட்டபடி ஜூன் 4-ல் பள்ளிகள் திறக்கப்படுமா? என்பது குறித்த பள்ளிக்கல்வித்துறையின் அடுத்தகட்ட அதிரடி அறிவிப்பை நோக்கி ஒட்டுமொத்த தமிழக மாணவர்களும் பெற்றோர்களும் எதிர்பார்த்துக் காத்துள்ளனர்.