36.73 கோடி வாக்காளர்கள்... 3-ம் கட்ட (SIR) சிறப்பு வாக்காளர் பட்டியல் மறுஆய்வு தொடக்கம் - இந்திய தேர்தல் ஆணையம் அதிரடி.. மூன்று பகுதிகளுக்கு விலக்கு!

இந்தியத் தேர்தல் ஆணையம், நாடு தழுவிய அளவில் வாக்காளர் பட்டியல்களைச் சீரமைக்கும் நோக்கில், சிறப்புத் தீவிர மறுஆய்வின் (SIR) மூன்றாம் கட்டத்தைத் தொடங்கியுள்ளது.  தேர்தல் ஆணையம் வெளியிட்டுள்ள அறிவிப்பின்படி, இந்த மூன்றாம் கட்டம் வாக்காளர் பட்டியலின் துல்லியத்தன்மையை உறுதி செய்வதற்கான ஒரு முக்கிய மைல்கல்லாகக் கருதப்படுகிறது:

சுமார் 3.94 லட்சத்திற்கும் அதிகமான வாக்குச்சாவடி நிலை அலுவலர்கள் இந்தப் பணியில் ஈடுபடுத்தப்பட்டுள்ளனர். நாடு முழுவதும் சுமார் 36.73 கோடி வாக்காளர்களின் வீடுகளுக்கே நேரடியாகச் சென்று சரிபார்ப்புப் பணிகள் மேற்கொள்ளப்பட உள்ளன. தலைநகர் டெல்லியிலும் இந்த மறுஆய்வு நடைபெறுகிறது. இங்கு இறுதி வாக்காளர் பட்டியல் அக்டோபர் 7-ஆம் தேதி வெளியிடப்படும் என அறிவிக்கப்பட்டுள்ளது.

தேசிய மக்கள்தொகைக் கணக்கெடுப்பின் கீழ் நடைபெற்று வரும் வீட்டுப் பட்டியல் பணிகளுடன், இந்த அட்டவணை ஒருங்கிணைக்கப்பட்டுள்ளது. இமாச்சலப் பிரதேசம், ஜம்மு காஷ்மீர் மற்றும் லடாக் ஆகிய மூன்று பகுதிகளுக்கு மட்டும் தற்போது இந்த மறுஆய்வில் இருந்து விலக்கு அளிக்கப்பட்டுள்ளது.  இப்பகுதிகளில் நிலவும் கடுமையான பனிப்பொழிவு மற்றும் உயரமான மலைப்பகுதிகளில் உள்ள தட்பவெப்ப நிலை களப்பணிக்குத் தடையாக உள்ளது. மக்கள் தொகைக் கணக்கெடுப்பின் இரண்டாம் கட்டம் நிறைவடைவதைப் பொறுத்து, இப்பகுதிகளுக்கான தனி அட்டவணை பின்னர் வெளியிடப்படும்.

நிலப்பரப்பு சார்ந்து செயல்படுவதில் உள்ள கட்டுப்பாடுகள் காரணமாக, அங்குள்ள சூழல் சீரானவுடன் பணிகள் தொடங்கப்படும். பீகார், உ.பி மற்றும் மேற்கு வங்கம் ஆகிய மாநிலங்களில் சிறப்புத் தீவிர மறுஆய்வு (SIR) என்பது வாக்காளர் பட்டியலில் உள்ள குளறுபடிகளை நீக்குவதில் பெரும் மாற்றத்தை ஏற்படுத்தியுள்ளது.

பீகாரில் மேற்கொள்ளப்பட்ட முதற்கட்ட ஆய்வில், சுமார் 47 லட்சம் வாக்காளர்கள் (மொத்த எண்ணிக்கையில் 5-6%) பட்டியலிலிருந்து நீக்கப்பட்டனர். இரண்டாம்கட்டமாக (அக்டோபர் 2025) உ.பி மற்றும் மேற்கு வங்கம் உள்ளிட்ட 9 மாநிலங்களில் நடைபெற்றது. இதில் உத்தரப் பிரதேசத்தில் 2.04 கோடி பெயர்களும், மேற்கு வங்கத்தில் 83.86 லட்சம் பெயர்களும் நீக்கப்பட்டன.

இந்தப் பணியைத் தொடங்கி வைத்த தலைமைத் தேர்தல் ஆணையர் ஞானேஷ் குமார், "தகுதியற்றவர்கள் நீக்கப்படுவதையும், தகுதியுள்ள வாக்காளர்கள் விடுபடாமல் இருப்பதையும் உறுதி செய்வதே SIR-ன் நோக்கம்" என்று கூறினார். மேலும், அனைத்து வாக்காளர்களும் தங்களது கணக்கெடுப்புப் படிவங்களைச் சமர்ப்பித்து இந்த ஜனநாயகக் கடமையில் முழுமையாகப் பங்கேற்குமாறு அவர் கேட்டுக் கொண்டுள்ளார்.