ஞாயிற்றுக்கிழமை விடுமுறை கிடையாது... தமிழகம் முழுவதும் ரேஷன் கடைகள் வழக்கம் போல் இயங்கும் - உணவுத்துறை அறிவிப்பு!

ஆயுத பூஜை மற்றும் விஜயதசமி தொடர் விடுமுறை நாட்களில் பொதுமக்களுக்கு அத்தியாவசியப் பொருட்கள் தடையின்றி கிடைப்பதை உறுதி செய்யும் வகையில், வரவிருக்கும் ஞாயிற்றுக்கிழமை தமிழ்நாட்டில் உள்ள அனைத்து ரேஷன் கடைகளும் வழக்கம்போல் செயல்படும் என அறிவிக்கப்பட்டுள்ளது.

தமிழ்நாட்டில் அடுத்தடுத்த நாட்களில் ஆயுத பூஜை மற்றும் விஜயதசமி விழாக்களையொட்டி அரசுப் பொது விடுமுறை அளிக்கப்படவுள்ளது. குறிப்பாக, அக்டோபர் 19 மற்றும் 20 ஆகிய தேதிகளில் தொடர் விடுமுறை வருவதால், குடும்ப அட்டைதாரர்கள் தங்களுக்குத் தேவையான அத்தியாவசியப் பொருட்களை முன்கூட்டியே பெற்றுக்கொள்வதில் எந்தவிதச் சிரமமும் எதிர்கொள்ளக் கூடாது என்பதற்காக உணவுத்துறை இந்தச் சிறப்பு ஏற்பாட்டைச் செய்துள்ளது.

இதன் காரணமாக, பொதுமக்கள் வழக்கமான வேலை நாட்களில் செல்வதைப் போல வரும் ஞாயிற்றுக்கிழமையன்றும் ரேஷன் கடைகளுக்குச் சென்று தங்களுக்குரிய உணவுப் பொருட்கள் மற்றும் அத்தியாவசியப் பொருட்களைப் பெற்றுக் கொள்ளலாம் எனத் தெரிவிக்கப்பட்டுள்ளது.