"இந்திரா காந்தி மீது ஒருவித பயம் இருந்தது; கண்டிப்பானார்" - சுயசரிதை நூல் வெளியீட்டு விழாவில் சோனியா காந்தியின் நெகிழ்ச்சிப் பேச்சு!
டெல்லியில் உள்ள பிரபல நட்சத்திர விடுதியில் காங்கிரஸ் மூத்த தலைவர் சோனியா காந்தியின் சுயசரிதை நூலான 'Belonging: A Journey of Love' வெளியீட்டு விழா மிகச் சிறப்பாக நடைபெற்றது. இந்நிகழ்ச்சியில் சோனியா காந்தி தனது குடும்ப வாழ்க்கை, மாமியார் இந்திரா காந்தி குறித்தும், கணவர் ராஜீவ் காந்தியின் அரசியல் பிரவேசம் குறித்தும் பல சுவாரஸ்யமான மற்றும் உணர்வுபூர்வமான தகவல்களைப் பகிர்ந்து கொண்டார்.
"நான் இந்திரா காந்தியைக் கண்டு பிரமித்தேன். அவர் மிகவும் கண்டிப்பானவராகவும், அஞ்சத்தக்கவராகவும் இருந்தார். எனக்கு அவர் மீது ஒருவித பயம் இருந்தது. அவரை எப்படி அணுகுவது, என்ன பேசுவது என்று எனக்குத் தெரியாது. ராஜீவும், சஞ்சய் காந்தியும் அவரை 'மா' என்று அழைப்பார்கள்; ஆனால் என்னால் அப்படி அழைக்க முடியவில்லை. ஏனென்றால் எனக்கு ஒரே ஒரு அம்மாதான், அவர் இத்தாலியில் இருக்கும் எனது தாயார்" என்று சோனியா காந்தி குறிப்பிட்டார். மேலும், இந்திரா காந்தி கோபப்படும்போது தனது தந்தையை நினைவுபடுத்துவார் என்றும், ராகுல் மற்றும் பிரியங்கா பிறந்த பிறகு அவர் மிகவும் மென்மையானவராகவும், மற்றவர்களைப் புரிந்துகொள்பவராகவும் மாறினார் என்றும் அவர் தெரிவித்தார்.

"எனது கணவர் ராஜீவ் காந்தி அரசியலுக்கு வருவதை நான் மிகவும் எதிர்த்தேன். எனது மாமியார் இந்திரா காந்தி தனது வாழ்நாள் முழுவதையும் அரசியல் பணிக்காகவே அர்ப்பணித்ததை நான் பார்த்துள்ளேன். ராஜீவும் அரசியலுக்கு வந்தால் அவரை நான் இழக்க நேரிடும் என்று சுயநலமாக நினைத்தேன்" என்றார். இருப்பினும், அவர் அரசியலுக்கு வந்த பிறகு குடும்ப வாழ்க்கையில் மாற்றங்கள் ஏற்பட்டாலும், தங்களுக்கு இடையே இருந்த அன்பும் பிணைப்பும் மேலும் வலுவடைந்ததாக அவர் நெகிழ்ச்சியுடன் தெரிவித்தார்.
"ராஜீவ் காந்தியை இழந்த துயரமான காலகட்டத்தில், நான் ஒரு குழந்தையைப் போல மாறினேன்; எனது பிள்ளைகளான ராகுலும் பிரியங்காவும் எனக்குப் பெற்றோராக மாறினார்கள்" என்று அவர் குறிப்பிட்டுள்ளார்.

டெல்லி ஐடிசி ஓட்டலில் நடைபெற்ற இந்த நூல் வெளியீட்டு விழாவில், சோனியா காந்திக்கு அவரது மகன் ராகுல் காந்தி மற்றும் மகள் பிரியங்கா காந்தி ஆகியோர் வாழ்த்துகளைத் தெரிவித்தனர்.
இந்நிகழ்ச்சியில் சோனியா காந்தியின் வாழ்க்கை வரலாறு மற்றும் அரசியல் பயணத்தை விவரிக்கும் சிறப்புக்காணொளி ஒளிபரப்பப்பட்டது. அதனைத் தமிழக முதல்வர் விஜய், காங்கிரஸ் தலைவர்கள் மற்றும் பல்வேறு கூட்டணிக் கட்சித் தலைவர்கள் கலந்துகொண்டு பார்வையிட்டனர். குறிப்பாக, முதல் வரிசையில் ராகுல் காந்திக்கு அருகில் முதல்வர் விஜய் அமர்ந்திருந்தது அரசியல் அரங்கில் அனைவரது கவனத்தையும் ஈர்த்தது. மேலும், இந்நிகழ்ச்சியில் தனக்குக் கிடைத்த அன்பைக் கண்டு சோனியா காந்தி மிகவும் நெகிழ்ச்சி அடைந்தார்.
