இந்த வருடம் மின் கட்டண உயர்வு இல்லை - அமைச்சர் சி.டி.ஆர். நிர்மல்குமார் அறிவிப்பு!

தமிழ்நாடு மின்சார வாரியத்தின் 21 ஆண்டுகால வெள்ளை அறிக்கையை இன்று காலை சென்னையில் வெளியிட்ட மின்சாரத் துறை அமைச்சர் சி.டி.ஆர். நிர்மல்குமார், பொதுமக்களுக்குப் பெரும் நிம்மதி அளிக்கும் மிக முக்கிய அறிவிப்பு ஒன்றை வெளியிட்டுள்ளார். நடப்பு நிதியாண்டில் தமிழ்நாட்டில் மின் கட்டணம் உயர்த்தப்படாது என்று அவர் திட்டவட்டமாகத் தெரிவித்துள்ளார்.

மின்சார வாரியம் ₹2,47,130 கோடி மகா கடன் சுமையில் மூழ்கியுள்ளதாக அறிவித்திருந்த நிலையில், கட்டணம் உயர்த்தப்படுமோ என்ற பயத்தில் இருந்த பொதுமக்களுக்கு அமைச்சரின் இந்த அறிவிப்பு பெரும் ஆறுதலாக அமைந்துள்ளது. வெள்ளை அறிக்கையை வெளியிட்டுப் பேசிய அமைச்சர் நிர்மல்குமார், முந்தைய திமுக ஆட்சிக்காலத்தில் மின்சாரத் துறை அமைச்சராக இருந்த செந்தில் பாலாஜியின் நிர்வாகத் திறனைப் பகிரங்கமாகக் கடுமையாக விமர்சித்தார்.

முந்தைய ஆட்சியில் மின்சாரத் துறை அமைச்சராக இருந்த செந்தில் பாலாஜி, மின்துறையை மேம்படுத்துவது தொடர்பாகப் பல்வேறு பிரம்மாண்ட அறிவிப்புகளை மட்டுமே கொடுத்தார்; ஆனால், களத்தில் எந்தவொரு திட்டத்தையும் முழுமையாகச் செயல்படுத்தவில்லை என்று குற்றம் சாட்டினார்.

கடந்த கால ஆட்சிகளில் அடுத்தடுத்து மின் கட்டணங்கள் உயர்த்தப்பட்ட போதிலும், மின்சார வாரியத்தின் கடன் குறையவில்லை. அந்த மின் கட்டண உயர்வால் உண்மையில் யார் பலன் அடைந்தார்கள் என்பது குறித்து அப்போதைய முன்னாள் அமைச்சர்களிடம்தான் கேட்க வேண்டும் என்று அமைச்சர் காட்டமாகச் சாடினார்.

மின்சார வாரியத்தில் நிலவி வரும் கடுமையான நிதி நெருக்கடி மற்றும் முந்தைய அரசுகள் உற்பத்திக்கு முன்னுரிமை கொடுக்காமல் தனியாரிடம் மின் கொள்முதல் செய்து மறைமுகமாக வருமானம் பார்த்த சீர்கேடுகள் ஒருபுறம் இருந்தாலும், அதன் சுமையைத் தற்போதைய தவெக அரசு மக்கள் மீது திணிக்காது என்று அமைச்சர் உறுதிபடத் தெரிவித்தார்.

இந்த ஆண்டிற்குள் 20,000 பேருக்கு மின்துறையில் புதிய வேலைவாய்ப்புகள் வழங்கப்படும் என்றும், நிறுத்தி வைக்கப்பட்டிருந்த 5,000 கேங் மேன்களும் பணியில் அமர்த்தப்படுவார்கள் என்றும் அறிவித்திருந்த அமைச்சர் நிர்மல்குமார், தற்போது மின் கட்டண உயர்வும் இல்லை என்று அறிவித்திருப்பது தவெக அரசின் மக்கள் நலன் சார்ந்த அணுகுமுறையாகப் பார்க்கப்படுகிறது.