திருச்செந்தூரில் தொடர்ந்து 2 வது நாளாக உள்வாங்கிய கடல்!

முருகப்பெருமானின் அறுபடை வீடுகளில் 2 ஆம் படை வீடான திருச்செந்தூர் சுப்பிரமணிய சுவாமி கோவிலுக்கு தினமும் ஏராளமான பக்தர்கள் வருகை தருகின்றனர். இங்கு வரும் பக்தர்கள் அனைவரும் கடலில் புனித நீராடிவிட்டு சாமி தரிசனம் செய்வதை தங்களது வழக்கமாக கொண்டுள்ளனர். இந்நிலையில் திருச்செந்தூர் கோவில் கடலில் தொடர்ந்து 2 ஆவது நாளாக இன்றும் கடல் நீர் அதிக அளவில் உள்வாங்கியுள்ளது. இதனால் பல அடி தூரத்திற்கு பாறைகள் வெளியே தெரிந்ததுடன் அலைகளின் சீற்றமும் வெகுவாக குறைந்து காணப்பட்டது.

பொதுவாக ஒவ்வொரு மாதமும் அமாவாசை மற்றும் பவுர்ணமி நாட்களில் சுற்றியுள்ள தினங்களில் காலையில் கடல் உள்வாங்குவது வழக்கமாக நடைபெற்று வருகிறது. அதன்படி இன்று காலை சுமார் 50 அடி தூரத்திற்கு கடல் உள்வாங்கியதால் கடலுக்கு அடியில் இருந்த பாசி படர்ந்த பாறைகள் அனைத்தும் வெளியே தெரிந்தன. மாலையில் மீண்டும் இயல்பு நிலைக்கு திரும்பும் என்றாலும் அதிகாலையில் ஏற்பட்ட இந்த திடீர் மாற்றத்தால் அப்பகுதியில் சற்று பரபரப்பு நிலவியது. இருப்பினும் கோவிலுக்கு வந்திருந்த பக்தர்கள் எந்தவித அச்சமுமின்றி வழக்கம்போல் கடலில் புனித நீராடி சாமி தரிசனம் செய்து மகிழ்ந்தனர்.

கடல் நீர் வெகுவாக உள்வாங்கி பாறைகள் வெளியே தெரிவதால் பக்தர்கள் மிகுந்த கவனத்துடன் இருக்குமாறு அதிகாரிகள் தரப்பில் அறிவுறுத்தப்பட்டுள்ளனர். பாறைகளில் ஏறி நின்று தங்களது கைபேசிகளில் புகைப்படம் எடுக்கும் போது வழுக்கி விழ வாய்ப்புள்ளதால் மக்கள் எச்சரிக்கையாக இருக்க வேண்டும் என கூறப்பட்டுள்ளது. எனவே பக்தர்கள் அனைவரும் மிகவும் பாதுகாப்பான முறையில் கடலில் குளிக்கும்படி கோவில் நிர்வாகம் மற்றும் காவல் துறை சார்பில் தொடர்ந்து வலியுறுத்தப்பட்டு வருகிறது. இயற்கை எழில் கொஞ்சும் இந்த அரிய நிகழ்வை ஏராளமான பொதுமக்களும் பக்தர்களும் மிகுந்த ஆச்சரியத்துடன் கண்டு களித்து சென்றனர்.