ஊட்டியில் திருமாவளவன் படகு சவாரி.. வைரலாகும் வீடியோ!
நாடாளுமன்றப் பாதுகாப்புக் குழுவின் ஆய்வுக் கூட்டத்திற்காகத் தமிழகத்தின் முதன்மை மலைப்பிரதேசமான நீலகிரி மாவட்டத்திற்கு வந்துள்ள நாடாளுமன்ற உறுப்பினர்கள், தங்களது பணிகளுக்கு இடையே அங்குள்ள சுற்றுலாத் தலங்களைப் பார்வையிட்டனர். பைக்காரா ஏரிப் பகுதியில் விசிக தலைவர் தொல். திருமாவளவன் படகு சவாரி செய்த வீடியோ தற்போது சமூக வலைதளங்களில் பரவலாகப் பகிரப்பட்டு வருகின்றன.
நாடாளுமன்றப் பாதுகாப்பு நிலைக்குழுவைச் சேர்ந்த 14 நாடாளுமன்ற உறுப்பினர்கள் அடங்கிய குழுவினர் நேற்று நீலகிரி மாவட்டம் குன்னூரில் உள்ள புகழ்பெற்ற வெலிங்டன் ராணுவப் பயிற்சிக் கல்லூரிக்கு வருகை தந்தனர். அங்கு ராணுவ அதிகாரிகளுடனான கலந்தாய்வு மற்றும் பாதுகாப்பு உத்திகள் குறித்த தங்களது அதிகாரப்பூர்வ ஆய்வுகளை நிறைவு செய்த பின்னர், இக்குழுவினர் ஊட்டி வந்தடைந்தனர். அங்குள்ள தனியார் விடுதி ஒன்றில் தங்கியிருந்த அவர்கள், இன்று மாவட்டத்தின் முக்கியச் சுற்றுலாத் தலங்களைப் பார்வையிடத் திட்டமிட்டனர்.
இன்று காலை உதகையை அடுத்த பைக்காரா படகு இல்லத்திற்கு நாடாளுமன்றக் குழுவினர் பலத்த பாதுகாப்புடன் வருகை தந்தனர். நாடாளுமன்ற நிலைக்குழுவில் உறுப்பினராக உள்ள விசிக தலைவர் தொல். திருமாவளவன் எம்.பி மற்றும் அவருடன் வந்திருந்த பிற நாடாளுமன்ற உறுப்பினர்கள் பைக்காரா ஏரியின் இயற்கை எழிலை ரசித்தபடி படகில் சவாரி செய்தனர்.
கோடைக்காலக் குளிர்ச்சியை அனுபவித்தபடி திருமாவளவன் உள்ளிட்ட மக்கள் பிரதிநிதிகள் படகில் பயணித்த புகைப்படங்கள் மற்றும் காணொளிகள் ஊடகங்களிலும் சமூக வலைதளங்களிலும் வெளியாகிப் பொதுமக்களின் கவனத்தை ஈர்த்து வருகின்றன.
அதிகாரப்பூர்வ ஆய்வுகளுக்கு இடையே நாடாளுமன்றக் குழுவினர் நீலகிரியின் இயற்கைச் சூழலை ரசித்துப் பயணித்தது ஒரு தற்காலிக ஆசுவாசமாக அமைந்ததாகப் பாதுகாப்பு வட்டாரங்கள் தெரிவித்தன.