திருப்பதியில் ஜூன் இறுதிவரை விஐபி தரிசனம் ரத்து !

திருப்பதி ஏழுமலையான் கோவிலில் கோடை விடுமுறை காரணமாகப் பக்தர்களின் வருகை முன் எப்போதும் இல்லாத அளவிற்கு அதிகரித்துள்ளது. குறிப்பாக, இலவச தரிசனத்திற்காக வரும் சாமானிய பக்தர்கள் சுமார் 24 மணி நேரத்திற்கும் மேலாக நீண்ட வரிசையில் காத்திருந்து சுவாமி தரிசனம் செய்யும் சூழல் நிலவுகிறது. பக்தர்களின் இந்தச் சிரமத்தைக் குறைக்கத் திருமலை திருப்பதி தேவஸ்தானம் அதிரடி நடவடிக்கைகளை எடுத்துள்ளது.

இதன்படி, வரும் ஜூன் மாதம் இறுதி வரை விஐபி பிரேக் தரிசனம் முழுமையாக ரத்து செய்யப்படுவதாக அறிவிக்கப்பட்டுள்ளது. நாள்தோறும் சுமார் 3,000-க்கும் மேற்பட்டோர் இந்தச் சிறப்புத் தரிசனத்தைப் பயன்படுத்தி வந்த நிலையில், தற்போது இதனை ரத்து செய்ததன் மூலம் தினமும் கூடுதலாக 15,000 சாமானிய பக்தர்கள் ஏழுமலையானைத் தரிசிக்க வழிவகை செய்யப்பட்டுள்ளது. மேலும், சர்வ தரிசன டோக்கன் வழங்கும் முறையையும் தற்காலிகமாக நிறுத்தத் தேவஸ்தானம் திட்டமிட்டுள்ளது.

வழக்கமாக ரூ.500 கட்டணத்தில் முக்கியப் பிரமுகர்கள் மற்றும் பரிந்துரை கடிதங்கள் வைத்திருப்பவர்களுக்கு வழங்கப்பட்டு வந்த இந்த விஐபி தரிசன நேரம், இனி பொதுமக்களின் பயன்பாட்டிற்காக மாற்றப்படும். கோடைக்காலக் கூட்ட நெரிசலைக் கட்டுப்படுத்தவும், வரிசையில் காத்திருக்கும் பக்தர்களுக்குத் தேவையான குடிநீர் மற்றும் உணவு வசதிகளைச் செய்யவும் போர்க்கால அடிப்படையில் ஏற்பாடுகள் செய்யப்பட்டுள்ளன. தேவஸ்தானத்தின் இந்த முடிவால் நீண்ட தூரம் பயணம் செய்து வரும் சாமானிய பக்தர்கள் மிகுந்த மகிழ்ச்சியடைந்துள்ளனர்.