மீண்டும் காவலர் மீது தாக்குதல்! திருச்செந்தூர் எக்ஸ்பிரஸ் ரயிலில் பெண் போலீசைத் தாக்கிய ஆகாஷ் கைது

சென்னை–திருச்செந்தூர் அதிவிரைவு ரயிலில் பணியில் இருந்த பெண் ரயில்வே காவலர் கவிதாவைத் தாக்கியதாக ஆகாஷ் என்ற இளைஞரை ரயில்வே போலீசார் கைது செய்துள்ளனர். ஏற்கெனவே போராட்டத்தின்போது காவல் அதிகாரியைத் தாக்கிய வழக்கில் கைதாகியிருந்த அவர், மீண்டும் காவலர் மீது தாக்குதல் நடத்தியதாகக் கூறப்படும் சம்பவம் பரபரப்பை ஏற்படுத்தியுள்ளது.

ரயிலில் ஏற்பட்ட வாக்குவாதம்

திருச்செந்தூரில் இருந்து சென்னை நோக்கிச் சென்ற அதிவிரைவு ரயில், கும்பகோணம் அருகே வந்தபோது இந்தச் சம்பவம் நடந்ததாகக் கூறப்படுகிறது. முன்பதிவில்லாத பெட்டியில் படிக்கட்டு பகுதியில் நின்று பயணம் செய்தவர்களை உள்ளே செல்லுமாறு பெண் காவலர் கவிதா அறிவுறுத்தியுள்ளார். அப்போது ஆகாஷ் வாக்குவாதத்தில் ஈடுபட்டு அவரைத் தாக்கியதாகத் தகவல்கள் தெரிவிக்கின்றன. இதில் காயமடைந்த பெண் காவலர் மருத்துவமனையில் அனுமதிக்கப்பட்டதாகவும் கூறப்படுகிறது.

ஏற்கெனவே காவல் அதிகாரியைத் தாக்கிய வழக்கு

சில மாதங்களுக்கு முன்பு, தஞ்சாவூரில் விடுதலைச் சிறுத்தைகள் கட்சியினர் நடத்திய போராட்டத்தின்போது பாதுகாப்புப் பணியில் இருந்த சிறப்பு உதவி ஆய்வாளரை ஆகாஷ் தாக்கியதாகப் புகார் எழுந்தது. அந்தச் சம்பவத்தில் அவர் கைது செய்யப்பட்டு பின்னர் பிணையில் விடுவிக்கப்பட்டதாகத் தகவல்கள் தெரிவிக்கின்றன.இந்நிலையில், ரயிலில் பெண் காவலரைத் தாக்கியதாகக் கூறப்படும் புதிய சம்பவம் தொடர்பாக ரயில்வே போலீசார் ஆகாஷைக் கைது செய்து விசாரணை நடத்தி வருகின்றனர்.