டிஎன்பிஎஸ்சி குரூப்-1 தேர்வு.. 57,612 பேர் ஆப்சென்ட் - 2 மாதங்களில் தேர்வு முடிவுகள் வெளியீடு!

தமிழ்நாடு அரசுப் பணியாளர் தேர்வாணையம் (டிஎன்பிஎஸ்சி) சார்பில் நடத்தப்பட்ட குரூப்-1 முதல்நிலைத் தேர்வு தமிழகம் முழுவதும் வெற்றிகரமாக நிறைவடைந்துள்ள நிலையில், தேர்வு வருகைப் பதிவு மற்றும் முடிவுகள் குறித்த விவரங்கள் வெளியிடப்பட்டுள்ளன.

டிஎன்பிஎஸ்சி குரூப்-1 தேர்வின் மூலம் துணை கலெக்டர், வணிகவரி உதவி ஆணையர் உள்ளிட்ட பல்வேறு பணிகளுக்கான காலிப்பணியிடங்கள் ஆரம்பத்தில் 26 ஆக அறிவிக்கப்பட்டு, பின்னர் 20 இடங்கள் அதிகரிக்கப்பட்டு மொத்தம் 46 பணியிடங்களாக உயர்த்தப்பட்டது.

தமிழகம் முழுவதும் இத்தேர்வுக்கு 2 லட்சத்து 23 ஆயிரத்து 440 பேர் அனுமதிக்கப்பட்டிருந்தனர். நேற்று நடைபெற்ற தேர்வில் 1 லட்சத்து 65 ஆயிரத்து 828 பேர் (74.22 சதவீதம்) கலந்து கொண்டு தேர்வு எழுதினர்.

தேர்வு எழுதாமல் மொத்தம் 57 ஆயிரத்து 612 பேர் (25.78 சதவீதம்) ஆப்செண்ட் ஆகியுள்ளனர். மாநிலம் முழுவதும் 754 தேர்வு மையங்களில் இத்தேர்வு நடத்தப்பட்டது.

குரூப்-1 முதல்நிலைத் தேர்வு முடிவுகள் அடுத்த இரண்டு மாதங்களுக்குள் வெளியிடப்படும் என டிஎன்பிஎஸ்சி தலைவர் எஸ்.கே.பிரபாகர் தெரிவித்துள்ளார். மேலும், இறுதி முடிவுகள் வெளியாகும் கட்டத்தில் கூடுதல் காலிப்பணியிடங்கள் குறித்த அறிவிப்புகள் வெளியாக வாய்ப்புள்ளதாகவும் அவர் குறிப்பிட்டுள்ளார்.