முன்னாள் மனைவியின் திருமணத்தை நடத்தி வைத்த ‘ஸ்பைடர் மேன்’ நடிகர் டோபி மாகுவேர்!

‘ஸ்பைடர் மேன்’ திரைப்படங்கள் மூலம் உலகம் முழுவதும் பிரபலமான ஹாலிவுட் நடிகர் டோபி மாகுவேர், தனது முன்னாள் மனைவி ஜெனிபர் மேயரின் மறுமணத்தை முன்னின்று நடத்தி வைத்துள்ளார். விவாகரத்து முடிவடைந்த சில வாரங்களிலேயே நடைபெற்ற இந்தத் திருமணத்தில் டோபி மாகுவேர் பங்கேற்று மணமக்களை கணவன், மனைவியாக அறிவித்த சம்பவம் ரசிகர்களின் கவனத்தை ஈர்த்துள்ளது.

பிரபல நகை வடிவமைப்பாளரான ஜெனிபர் மேயர், தொழிலதிபரும் இசைத் துறை நிர்வாகியுமான ஜெஃப் ஒகுன்லேசியை அக்டோபர் 10-ம் தேதி ஹவாய் தீவில் உள்ள ஃபோர் சீசன்ஸ் ரிசார்ட் லனாயில் திருமணம் செய்துகொண்டார். இந்த விழாவில் ஹாலிவுட் நடிகர் லியோனார்டோ டிகாப்ரியோ, அமேசான் நிறுவனர் ஜெஃப் பெசோஸ் உள்ளிட்ட பல பிரபலங்கள் கலந்து கொண்டதாகத் தகவல்கள் தெரிவிக்கின்றன.

டோபி மாகுவேரும் ஜெனிபர் மேயரும் கடந்த 2007-ம் ஆண்டு திருமணம் செய்துகொண்டனர். இவர்களுக்கு ரூபி மற்றும் ஓடிஸ் என இரு குழந்தைகள் உள்ளனர். 2016-ம் ஆண்டு இருவரும் பிரிவதாக அறிவித்த நிலையில், அவர்களது விவாகரத்து 2026-ம் ஆண்டு செப்டம்பரில் இறுதி செய்யப்பட்டது. திருமண வாழ்க்கை முடிவுக்கு வந்தபோதிலும், குழந்தைகளை இணைந்து வளர்ப்பதில் இருவரும் நல்ல உறவைத் தொடர்ந்து வருவதாகக் கூறப்படுகிறது. முன்னாள் மனைவியின் திருமணத்தில் டோபி மாகுவேர் முக்கியப் பங்கு வகித்திருப்பது தற்போது பேசுபொருளாகியுள்ளது.