மதுபோதையில் அரசு பேருந்தை கடத்தி சுங்கச்சாவடியில் மோதிய இளைஞர் !

தெலுங்கானா மாநிலம் ஜஹோன் மாவட்டம் சென்னுரு கிராமத்தைச் சேர்ந்த இளைஞர் ஜிதபோனியா வெங்கையா. மண் அள்ளும் எந்திரமான ஜேசிபி ஓட்டும் ஆபரேட்டராகப் பணிபுரிந்து வரும் இவர், நேற்று முழு மதுபோதையில் ஜஹோன் மாவட்ட அரசு பேருந்து நிலையத்திற்குச் சென்றுள்ளார். அங்குப் பயணிகள் இன்றித் தனியாக நிறுத்தி வைக்கப்பட்டிருந்த ஒரு அரசுப் பேருந்தை, தனது சுய விருப்பத்தின் பேரில் திருடி ஓட்டிச் சென்றுள்ளார்.

முழு போதையில் இருந்த அந்த இளைஞர், அந்த அரசுப் பேருந்தைக் கட்டுப்பாடின்றிச் சாலையில் சுமார் 21 கிலோமீட்டர் தூரம் வரை அதிவேகமாக ஓட்டிச் சென்றுள்ளார். தொடர்ந்து சிங்கராஜுபள்ளி பகுதியில் உள்ள சுங்கச்சாவடிக்கு அருகே சென்ற போது, நிலைதடுமாறி அங்கிருந்த சுங்கச்சாவடி தடுப்புகள் மீது பேருந்தை பலமாக மோதி விபத்துக்குள்ளாக்கினார். பேருந்து மோதிய சத்தம் கேட்டு அதிர்ச்சியடைந்த அங்கிருந்த ஊழியர்கள், உடனடியாக இதுகுறித்து உள்ளூர் காவல் துறையினருக்கு அவசரத் தகவல் கொடுத்தனர்.

சம்பவ இடத்திற்கு விரைந்து வந்த போலீசார், விபத்தை ஏற்படுத்திய ஜிதபோனியா வெங்கையாவை கையும் களவுமாகப் பிடித்து அதிரடியாகக் கைது செய்து சிறையில் அடைத்தனர். அதிர்ஷ்டவசமாகப் பேருந்து நிலையத்திலோ அல்லது சுங்கச்சாவடியிலோ இந்த விபத்தினால் யாருக்கும் எவ்வித உயிர்ச்சேதமும் ஏற்படவில்லை எனப் போலீசார் தரப்பில் தெரிவிக்கப்பட்டுள்ளது. போதை ஆசாமியின் இந்த விபரீதமான அரசுப் பேருந்து கடத்தல் சம்பவம் தெலுங்கானா மாநில பொதுமக்களிடையே பெரும் பரபரப்பை ஏற்படுத்தியுள்ளது.