தமிழகத்தில் ஜூன் 1 முதல் 60 சுங்கச்சாவடிகளில் கட்டண உயர்வு அமல் - வாகன ஓட்டிகள் அதிர்ச்சி!

தமிழ்நாட்டில் தேசிய நெடுஞ்சாலைகளில் உள்ள சுங்கச்சாவடிகளில் ஆண்டுதோறும் மேற்கொள்ளப்படும் கட்டண உயர்வு, ஜூன் 1-ம் தேதி முதல் அமலுக்கு வரவுள்ளது குறித்த அதிகாரப்பூர்வ விவரங்கள் வெளியாகியுள்ளன. 

இந்தியத் தேசிய நெடுஞ்சாலைகள் ஆணையத்தின் விதிமுறைகளின்படி, நாடு முழுவதும் உள்ள சுங்கச்சாவடிகளில் ஆண்டுதோறும் கட்டண திருத்தம் மேற்கொள்ளப்பட்டு வருகிறது. அந்த வகையில், தமிழ்நாட்டில் உள்ள 60 முக்கியச் சுங்கச்சாவடிகளில் மாற்றி அமைக்கப்பட்ட புதிய கட்டண விகிதங்கள் வரும் ஜூன் 1-ம் தேதி முதல் அதிகாரப்பூர்வமாக நடைமுறைக்கு வரவுள்ளன.

தேர்தல் காரணங்களால் தற்காலிகமாக ஒத்திவைக்கப்பட்டிருந்த இந்தக் கட்டண உயர்வு தற்பொழுது அமல்படுத்தப்படுவதால், சரக்குக் போக்குவரத்து மற்றும் பயணச் செலவுகள் அதிகரிக்கக்கூடும் என எதிர்பார்க்கப்படுகிறது.

தேசிய நெடுஞ்சாலைகள் கட்டண விதிகளின்படி, வழக்கமாக இந்த ஆண்டிற்கான சுங்கக்கட்டண உயர்வு கடந்த ஏப்ரல் மாத தொடக்கத்திலேயே அமலுக்கு வந்திருக்க வேண்டும். எனினும், அந்தச் சமயத்தில் நாடு முழுவதும் பொதுத்தேர்தல் அறிவிக்கப்பட்டு, தேர்தல் நடத்தை விதிமுறைகள் நடைமுறையில் இருந்ததால், பொதுமக்களின் நலன் கருதி இந்தக் கட்டண உயர்வு தற்காலிகமாக நிறுத்தி வைக்கப்பட்டிருந்தது.

தற்போது தேர்தல் நடைமுறைகள் அனைத்தும் முழுமையாக நிறைவடைந்துள்ள சூழலில், நிறுத்தி வைக்கப்பட்டிருந்த கட்டண உயர்வை ஜூன் 1 முதல் அமல்படுத்தத் தேசிய நெடுஞ்சாலைகள் ஆணையம் ஒப்புதல் அளித்துள்ளது. மொத்தமுள்ள சுங்கச்சாவடிகளில் வாகனங்களின் வகைகள் மற்றும் பயண தூரத்தின் அடிப்படையில் சுமார் 5% வரை கட்டண உயர்வு நிர்ணயிக்கப்பட்டுள்ளது.

கார், ஜீப், வேன் போன்ற இலகுரக வாகனங்களுக்கு ஒருமுறை மற்றும் இருமுறை சென்று வருவதற்கான கட்டணங்கள் வாகன வகையைப் பொறுத்து மாற்றியமைக்கப்பட்டுள்ளன. இதேபோல் பேருந்து, லாரி மற்றும் கனரக லாரிகளுக்கான கட்டணங்களும் விகிதாச்சார அடிப்படையில் உயர்த்தப்பட்டுள்ளன.

சுங்கச்சாவடிகளைத் தினமும் பயன்படுத்தும் உள்ளூர் வாகன ஓட்டிகளுக்கான மாதாந்திர பாஸ் கட்டணங்கள், வாகனத்தின் தன்மையைப் பொறுத்து 5 ரூபாய் முதல் 10 ரூபாய் வரை அதிகரிக்கப்பட்டுள்ளது. இந்தக் கட்டண உயர்வு சென்னை - கன்னியாகுமரி, திருச்சி - சேலம், சென்னை - பெங்களூரு மற்றும் சேலம் - கோவை உள்ளிட்ட மாநிலத்தின் மிக முக்கியத் தேசிய நெடுஞ்சாலைகளில் உள்ள சுங்கச்சாவடிகளில் பெரும் தாக்கத்தை ஏற்படுத்தும்.

சுங்கக்கட்டணம் உயர்த்தப்படுவதன் காரணமாகத் தொலைதூரப் பேருந்து கட்டணங்கள் மற்றும் அத்தியாவசியப் பொருட்களின் லாரி வாடகை உயர்ந்து, மறைமுகமாகச் சந்தையில் விளைபொருட்களின் விலை அதிகரிக்க வாய்ப்புள்ளதாக நுகர்வோர் அமைப்புகள் கவலை தெரிவித்துள்ளன.