இன்று முதல் சென்னையில் ஓராண்டுக்கு போக்குவரத்து மாற்றம்; மெட்ரோ, மழைநீர் வடிகால் பணிகளுக்காகக் கட்டுப்பாடு!

சென்னையில் மேற்கொள்ளப்பட்டு வரும் மெட்ரோ ரயில் இரண்டாம் கட்டப் பணிகள் மற்றும் சென்னை மாநகராட்சியின் மழைநீர் வடிகால் கட்டுமானப் பணிகள் காரணமாக, திருமங்கலம் மற்றும் கே.கே.நகர் ஆகிய முக்கியப் பகுதிகளில் இன்று ஜூன் 13, திங்கள்கிழமை முதல் போக்குவரத்து மாற்றங்கள் அமலுக்கு வருகின்றன.

திருமங்கலம் இணைப்புச் சாலையில் மெட்ரோ ரயில் இரண்டாம் கட்டப் பணிக்கான மேம்பாலப் பாதை கட்டுமானப் பணிகள் தொடங்கப்பட உள்ளன. பொதுமக்களின் பாதுகாப்பை உறுதி செய்யவும், விபத்துகளைத் தவிர்க்கவும் கடுமையான முன்னெச்சரிக்கை நடவடிக்கைகள் மேற்கொள்ளப்பட்டு வருகின்றன. இன்று முதல்  அடுத்தாண்டு ஜூலை 12ம் தேதி வரை ஒரு வருட காலத்திற்கு இந்தத் தற்காலிகப் போக்குவரத்து மாற்றம் நடைமுறையில் இருக்கும்.

திருமங்கலம் 100 அடி சாலையின் இடது பக்க இணைப்புச் சாலையில் வாகனப் போக்குவரத்து முற்றிலும் தடை செய்யப்பட்டு, அந்தச் சாலை முழுமையாக மூடப்படுகிறது. சர்வீஸ் சாலை மூடப்படுவதால், பாடி மேம்பாலப் பகுதியிலிருந்து அம்பத்தூர் நோக்கிச் செல்ல விரும்பும் வாகன ஓட்டிகளுக்குப் போக்குவரத்து காவல்துறை பரிந்துரைத்துள்ள மாற்று வழித்தட விபரங்கள்:

பாடி மேம்பாலத்திலிருந்து வருபவர்கள், திருமங்கலம் சந்திப்பிற்குப் பதிலாக 18-வது பிரதான சாலை அல்லது 6-வது அவென்யூ வழியாகத் தங்கள் பயணத்தைத் திருப்ப வேண்டும். அங்கிருந்து 13-வது பிரதான சாலையில் இடதுபுறமாகத் திரும்பி, பின்னர் சிறிது தூரம் பயணித்து 2-வது அவென்யூவில் வலதுபுறமாகத் திரும்ப வேண்டும்.

அதன்பிறகு, 100 அடி சாலையின் சர்வீஸ் சாலையில் வலதுபுறமாகத் திரும்பி, இறுதியாக அம்பத்தூர் எஸ்டேட் சாலையை அடைந்து தங்களது இலக்குகளை நோக்கிச் செல்லலாம்.

பாடி மேம்பாலத்திலிருந்து கோயம்பேடு நோக்கிச் செல்லும் வாகனங்களின் போக்குவரத்தில் எந்த மாற்றமும் செய்யப்படவில்லை. இந்த வாகனங்கள் வழக்கம்போல் திருமங்கலம் மேம்பாலத்தை எவ்விதத் தடங்கலும் இன்றிப் பயன்படுத்திக் கொள்ளலாம்.

சென்னை மாநகராட்சியால் கே.கே.நகர், பி.டி. ராஜன் சாலையில் மழைநீர் வடிகால் கட்டுமானப் பணிகள் மேற்கொள்ளப்பட்டு வருகின்றன. இன்று ஜூலை 13, திங்கள்கிழமை முதல் வரும் நவம்பர் 10-ம் தேதி வரை இந்த வழித்தடத்தில் போக்குவரத்து மாற்றம் அமலில் இருக்கும்.

இந்த வடிகால் கட்டுமானப் பணிகளின் காரணமாக, ஜீவானந்தம் சாலையில் வாகனங்கள் செல்வதற்குத் தற்காலிகமாகத் தடை விதிக்கப்பட்டுள்ளது. பெருநகரப் பகுதிகளில் உள்கட்டமைப்புப் பணிகள் நடைபெறும் போது, ஆரம்பக் கட்டத்தில் சில அசௌகரியங்கள் ஏற்படுவது இயல்பானதே என்பதால், பொதுமக்கள், குடியிருப்பாளர்கள் மற்றும் வாகன ஓட்டிகள் அனைவரும் இந்த மாற்றுப் போக்குவரத்து ஏற்பாடுகளுக்கு முழு ஒத்துழைப்பு நல்க வேண்டும் என்று சென்னை போக்குவரத்து காவல்துறை கேட்டுக் கொண்டுள்ளது. சாலையின் நெரிசலைத் தவிர்க்க வாகன ஓட்டிகள் தங்களது பயணங்களை முன்கூட்டியே திட்டமிட்டுக்கொள்ளுமாறு அறிவுறுத்தப்படுகிறார்கள்.