ஈரோட்டில் சோகம்... 4 நாட்களாகக் கிராமங்களுக்குள் சுற்றித்திரிந்த பெண் யானை உயிரிழப்பு!

ஈரோடு மாவட்டம் தாளவாடி அருகே வனப்பகுதியை விட்டு வெளியேறி, கடந்த நான்கு நாட்களாக விளைநிலங்கள் மற்றும் கிராமப் பகுதிகளில் சுற்றித்திரிந்த பெண் யானை ஒன்று இன்று காலை பரிதாபமாக உயிரிழந்தது.

ஈரோடு மாவட்டம் சத்தியமங்கலம் புலிகள் காப்பகத்திற்கு உட்பட்ட தாளவாடி அருகே ஜீர்கள்ளி வனச்சரகம் அமைந்துள்ளது. இந்த வனப்பகுதியில் இருந்து கடந்த 4 நாட்களுக்கு முன்பு, சுமார் 30 வயது மதிக்கத்தக்க பெண் யானை ஒன்று உணவிற்காகவோ அல்லது உடல்நலக் குறைவாலோ வன எல்லையை விட்டு வெளியேறியது.

மீண்டும் வனப்பகுதிக்குள் செல்லாத அந்த யானை, தாளவாடி அருகே உள்ள மல்லன்குழி மற்றும் கரளவாடி ஆகிய கிராமப் பகுதிகளுக்குள் புகுந்து, அங்குள்ள விளைநிலங்கள் மற்றும் குடியிருப்புப் பகுதிகளில் தொடர்ந்து சுற்றித்திரிந்து வந்தது.

யானை கிராமத்திற்குள் தொடர்ச்சியாக உலா வந்ததால், அப்பகுதி விவசாயிகள் மற்றும் பொதுமக்கள் தங்களின் அன்றாடப் பணிகளுக்குச் செல்ல முடியாமல் மிகுந்த அச்சமடைந்தனர். இது குறித்துத் தகவல் அறிந்த ஜீர்கள்ளி வனத்துறையினர் சம்பவ இடத்திற்கு விரைந்து வந்து, யானையின் நடமாட்டத்தைத் தீவிரமாகக் கண்காணித்து வந்தனர். மேலும், அந்த யானையை மீண்டும் அடர்ந்த வனப்பகுதிக்குள் விரட்டுவதற்கான முயற்சிகளையும் மேற்கொண்டு வந்தனர்.

இந்நிலையில், கடந்த சில நாட்களாகவே அந்தப் பெண் யானை மிகவும் சோர்வாகவும், உடல்நலக் குறைபாட்டுடனும் காணப்பட்டதாகத் தெரிகிறது. வனத்துறையினர் மற்றும் கால்நடை மருத்துவக் குழுவினர் யானைக்குத் தேவையான சிகிச்சைகளை வழங்க ஏற்பாடுகளைச் செய்து வந்த நிலையில், இன்று காலை அந்த யானை மல்லன்குழி கிராமத்தின் அருகிலேயே பரிதாபமாகத் தரையில் சுருண்டு விழுந்து உயிரிழந்தது.

யானையின் மரணத்திற்கான துல்லியமான காரணம் என்னவென்று உடனடியாகத் தெரியவில்லை. வனத்துறையினர் கால்நடை மருத்துவர்கள் மூலம் யானையின் உடற்கூராய்வு செய்த பிறகுதான், அது ஏதேனும் நோய் பாதிப்பால் இறந்ததா அல்லது உணவின்றி உயிரிழந்ததா என்பது குறித்த முழு விவரமும் தெரியவரும் என அதிகாரிகள் தெரிவித்துள்ளனர். ஊருக்குள் சுற்றித்திரிந்த யானை உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.