அதிர்ச்சி... திருமணத்திற்குத் தயாரான இளம்பெண் ஆற்றில் சடலமாக மீட்பு!

கேரள மாநிலம் பையனூர் பகுதியில், திருமணத்திற்குச் சில மாதங்களே இருந்த நிலையில் குடும்பத்தினருடன் ஆலோசனை மையத்திற்குச் சென்ற 24 வயது இளம்பெண் மர்மமான முறையில் மாயமானார். தொடர்ந்து நடத்தப்பட்ட தீவிரத் தேடுதல் வேட்டைக்குப் பிறகு, அவர் அருகிலுள்ள ஆற்றில் குதித்துத் தற்கொலை செய்துகொண்டதாகக் கருதப்படும் நிலையில் சடலயமாக மீட்கப்பட்டுள்ளார். இச்சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.

உயிரிழந்த இளம் பெண், பையனூர் மாவட்டம் கனாய் தாலுகாவில் உள்ள முக்கூடு பகுதியைச் சேர்ந்த காலஞ்சென்ற சந்திரன் மற்றும் ஜானகி தம்பதியரின் மகளான சி. ஸ்ருதி (24) என அடையாளம் காணப்பட்டுள்ளார். இவர் பையனூரில் உள்ள ஒரு வணிக வளாகத்தில் (Mall) பணிபுரிந்து வந்தார். இவருக்கு நான்கு மாதங்களுக்கு முன்பாகத் திருமணம் நிச்சயிக்கப்பட்டிருந்தது.

இந்நிலையில் மாலை சுமார் 4 மணியளவில் கோரம், கூர்க்கராவில் உள்ள ஒரு தனியார் ஆலோசனை மையத்திற்கு ஸ்ருதி சென்றுள்ளார். அவருடன் அவரது அத்தை சுலேகா, வருங்காலக் கணவர் அகில் மற்றும் அவரது மாமா சுரேஷ் ஆகியோரும் உடன் சென்றிருந்தனர். குடும்பத்தினரின் முன்னிலையில் ஆலோசகருடன் பேசிக்கொண்டிருந்தபோது, திடீரென ஸ்ருதி அங்கிருந்து வெளியேறி, வெளியே நிறுத்தப்பட்டிருந்த தனது ஸ்கூட்டரை எடுத்துக்கொண்டு யாரிடமும் எந்தத் தகவலும் தெரிவிக்காமல் அங்கிருந்து புறப்பட்டுச் சென்றுள்ளார்.

நேரம் கடந்தும் அவர் வீடு திரும்பாததால் பதற்றமடைந்த குடும்பத்தினர் பல்வேறு இடங்களில் தேடியுள்ளனர். இரவு வரை எந்தத் தகவலும் கிடைக்காததைத் தொடர்ந்து, அவரது மாமா எம். ஸ்ரீதரன் பையனூர் காவல் நிலையத்தில் புகார் அளித்தார்.

புகாரின் அடிப்படையில் காவல்துறையினர் விசாரணை நடத்தி வந்த நிலையில், இரவு சித்தரிக்கோவலில் உள்ள ரோட்டரி கிளப் சாலையில் அமைந்துள்ள தணல் எக்கோ பார்க்  அருகே ஸ்ருதி பயன்படுத்தி வந்த ஸ்கூட்டர் கண்டெடுக்கப்பட்டது. அதனைத் தொடர்ந்து அவரது காலணிகளும் ஆற்றங்கரையின் அருகிலேயே கண்டுபிடிக்கப்பட்டதால், அவர் ஆற்றில் குதித்துத் தற்கொலை செய்துகொண்டிருக்கலாம் என்ற பலத்த சந்தேகம் எழுந்தது.

இதனைத் தொடர்ந்து, பையனூர் தீயணைப்பு நிலையத்தைச் சேர்ந்த ஸ்கூபா நீச்சல் வீரர்கள் மற்றும் மீட்புக் குழுவினர் வரவழைக்கப்பட்டு, பெரும்பா - சித்தரிக்கோவல் பகுதியில் தீவிரத் தேடுதல் வேட்டை தொடங்கப்பட்டது.  இரவு முழுவதும் நடைபெற்ற தேடுதல் பணிக்குப் பிறகு, அடுத்தநாள் காலை மீண்டும் தேடுதல் தீவிரப்படுத்தப்பட்டது.

அடுத்த நாள் காலை சுமார் 11.15 மணியளவில், தணல் எக்கோ பார்க் அருகே ஆற்றில் இருந்து ஸ்ருதியின் உடல் சடலமாக மீட்கப்பட்டது. திருமணம் கைகூடி வந்த மகிழ்ச்சியான சூழலில், இளம் பெண் திடீரென ஆலோசனை மையத்திலிருந்து சென்று ஆற்றில் குதித்து உயிரை மாய்த்துக்கொண்டதற்கான உண்மையான காரணம் குறித்துக் காவல்துறையினர் தீவிர விசாரணை நடத்தி வருகின்றனர். மறைந்த ஸ்ருதிக்கு ஸ்ரீலட்சுமி என்ற ஒரு சகோதரி உள்ளார் என்பது குறிப்பிடத்தக்கது.