மத்திய இரயில்வேயில் 6,557 காலிப் பணியிடங்கள் அறிவிப்பு!

மத்திய அரசின் இரயில்வே துறையில் காலியாக உள்ள பல்வேறு பணியிடங்களை நிரப்புவதற்கான புதிய வேலைவாய்ப்பு அறிவிப்பு வெளியிடப்பட்டுள்ளது. இதன் மூலம் நாடு முழுவதும் உள்ள தகுதியான இளைஞர்களுக்குப் பெரிய அளவில் வேலை கிடைப்பதற்கான நல்ல வாய்ப்பு உருவாகியுள்ளது. இந்த வேலைவாய்ப்புத் திட்டத்தின் கீழ் மொத்தம் 6,557 தொழில்நுட்பப் பணியிடங்கள் நிரப்பப்பட உள்ளதாக இரயில்வே தேர்வு வாரியம் அதிகாரப்பூர்வமாகத் தெரிவித்துள்ளது.

இந்த அறிவிப்பில் இரண்டு முக்கியப் பிரிவுகளின் கீழ் காலிப் பணியிடங்கள் வகைப்படுத்தப்பட்டு அதற்கான ஊதிய விபரங்களும் விரிவாகக் குறிப்பிடப்பட்டுள்ளன. இதன்படி முதல் பிரிவில் 323 பணியிடங்களும், மூன்றாவது பிரிவில் 6,234 காலிப் பணியிடங்களும் நிரப்பப்பட உள்ளன. முதல் பிரிவுக்குத் தேர்வு செய்யப்படுபவர்களுக்கு ஆரம்ப ஊதியமாக 29,200 ரூபாயும், மூன்றாவது பிரிவினருக்கு 19,900 ரூபாயும் வழங்கப்படும் எனத் தெரிவிக்கப்பட்டுள்ளது.

இப்பணிகளுக்கு விண்ணப்பிக்க விரும்பும் தகுதியான நபர்கள் இணையதளம் வழியாக மட்டுமே தங்களது விண்ணப்பங்களைச் சமர்ப்பிக்க முடியும். இதற்கான விண்ணப்பப் பதிவு நாளை ஜூன் 30 ஆம் தேதி தொடங்கி அடுத்த மாதம் ஜூலை 29 ஆம் தேதி வரை நடைபெறும் என அறிவிக்கப்பட்டுள்ளது. விருப்பமும் தகுதியும் உள்ள விண்ணப்பதாரர்கள் இரயில்வே தேர்வு வாரியத்தின் அதிகாரப்பூர்வ இணையப் பக்கத்திற்குச் சென்று தங்களது விபரங்களைப் பதிவு செய்து கொள்ளலாம்.