முதன்முறை பயணம்... தமிழக முதலமைச்சராக நாளை டெல்லி செல்கிறார் விஜய்; பிரதமரைச் சந்திக்க ஏற்பாடுகள்!

தமிழக முதலமைச்சராகப் பொறுப்பேற்றுக் கொண்ட பிறகு, தமிழக வெற்றிக் கழகத்தின் தலைவர் சி. ஜோசப் விஜய் முதன்முறையாக நாளை டெல்லிக்குப் பயணம் மேற்கொள்ள உள்ளதாகப் பரபரப்புத் தகவல்கள் வெளியாகியுள்ளன. முதலமைச்சராகப் பொறுப்பேற்ற பின் மேற்கொள்ளும் முதல் அதிகாரப்பூர்வப் பயணம் இது என்பதால், அரசியல் மற்றும் அரசு நிர்வாக வட்டாரங்களில் இப்பயணம் பெரும் எதிர்பார்ப்பை ஏற்படுத்தியுள்ளது.

டெல்லி செல்லும் முதலமைச்சர் விஜய், அங்கு மாண்புமிகு குடியரசுத் தலைவர் திரௌபதி முர்மு, பாரதப் பிரதமர் நரேந்திர மோடி, மத்திய உள்துறை அமைச்சர் அமித் ஷா, மத்திய நிதியமைச்சர் நிர்மலா சீதாராமன் ஆகிய முக்கியத் தலைவர்களை  நேரில் சந்தித்துப் பேசத் திட்டமிட்டுள்ளதாகக் கூறப்படுகிறது. 

இச்சந்திப்புகளின் போது, தமிழ்நாட்டின் வளர்ச்சித் திட்டப் பணிகளுக்குத் தேவையான மத்திய அரசின் ஒப்புதல்கள், மாநிலத்திற்கு வர வேண்டிய நிதிப் பங்கீடு மற்றும் நிலுவைத் தொகைகளை விரைந்து விடுவிப்பது போன்ற பல்வேறு முக்கியக் கோரிக்கைகள் அடங்கிய மனுவை முதலமைச்சர் விஜய் நேரடியாக வழங்க உள்ளார்.

மத்திய அரசுப் பிரமுகர்களைத் தொடர்ந்து, தவெக அரசின் முக்கியக் கூட்டணிக் கட்சியான அகில இந்திய காங்கிரஸ் கட்சியின் மூத்த தலைவர் சோனியா காந்தி, மக்களவை எதிர்க்கட்சித் தலைவர் ராகுல் காந்தி மற்றும் காங்கிரஸ் தலைவர் மல்லிகார்ஜுன கார்கே உள்ளிட்ட எதிர்க்கட்சித் தலைவர்களையும் முதலமைச்சர் விஜய் சந்தித்துத் தமிழக அரசியல் நிலவரங்கள் குறித்து ஆலோசிக்க உள்ளதாகத் தெரிகிறது.

முதலமைச்சரின் வருகையை முன்னிட்டு, டெல்லியில் உள்ள 'தமிழ்நாடு அரசு இல்லத்தில்' அவர் தங்கும் அறை, ஆலோசனைக் கூடங்கள் உள்ளிட்ட பகுதிகளைப் புதுப்பிக்கும் பணிகள் போர்க்கால அடிப்படையில் தீவிரமாக நடைபெற்று வருகின்றன. தமிழ்நாட்டின் புதிய முதலமைச்சருக்குத் டெல்லியில் தமிழர் பாரம்பரிய முறைப்படி உற்சாக வரவேற்பு அளிக்க அரசு அதிகாரிகள் ஏற்கனவே டெல்லி விரைந்துள்ளனர். இந்த டெல்லி பயணம் குறித்துத் தமிழக அரசுத் தரப்பில் இன்னும் அதிகாரப்பூர்வமான பயண நிரல் வெளியாகவில்லை என்றாலும், நாளை அவர் டெல்லி செல்வது உறுதியாகியுள்ளதாகக் கோட்டை வட்டாரங்கள் தெரிவிக்கின்றன.