"சீனாவுடன் கைகோர்த்து ஹார்முஸ் நீரிணை நிரந்தரமாகத் திறப்பு": டிரம்ப் அதிரடி அறிவிப்பு!

அமெரிக்க அதிபர் டொனால்ட் டிரம்ப் தனது 'ட்ரூத் சோஷியல்'  தளத்தில் வெளியிட்டுள்ள பதிவு, மேற்காசியப் போர்ச் சூழலில் ஒரு முக்கியத் திருப்பமாகப் பார்க்கப்படுகிறது. ஹார்முஸ் நீரிணையைத் திறப்பது தொடர்பாகச் சீன அதிபர் ஜின் பிங்குடன் இணக்கம் ஏற்பட்டுள்ளதாக அவர் தெரிவித்துள்ளார்.

உலகின் மிக முக்கியமான எரிசக்திப் பாதையான ஹார்முஸ் நீரிணையை நிரந்தரமாகத் திறக்கும் முடிவைச் சீனா பெரிதும் வரவேற்பதாக டிரம்ப் குறிப்பிட்டுள்ளார். "இனி ஒருபோதும் இந்த நீரிணை மூடப்படாது; இது சீனாவுக்கும் ஒட்டுமொத்த உலகிற்கும் நான் செய்யும் உதவி" என அவர் பதிவிட்டுள்ளார்.

ஈரானுக்கு இனிமேல் ஆயுதங்களை வழங்கப் போவதில்லை என்று சீனா ஒப்புக்கொண்டுள்ளதாக டிரம்ப் உரிமை கோரியுள்ளார். முன்னதாக, ஈரான் சீனாவிடமிருந்து வான் பாதுகாப்பு ஏவுகணைகளை வாங்க முயற்சிப்பதாக அமெரிக்க உளவுத்துறை எச்சரித்திருந்த நிலையில், இந்தப் பேச்சுவார்த்தை முக்கியத்துவம் பெறுகிறது.

அடுத்த சில வாரங்களில் (மே 14-15 தேதிகளில்) தான் சீனா செல்ல உள்ளதாகவும், அப்போது அதிபர் ஜின் பிங் தன்னை "அன்புடன் கட்டித்தழுவி" வரவேற்பார் என்றும் டிரம்ப் உற்சாகமாகத் தெரிவித்துள்ளார். "சண்டையிடுவதை விட அறிவுக்கூர்மையுடன் இணைந்து செயல்படுவதே சிறந்தது" என்றும் அவர் குறிப்பிட்டுள்ளார்.

ஹார்முஸ் நீரிணை அடைக்கப்பட்டதால் கச்சா எண்ணெய் விலை ஒரு பீப்பாய்க்கு $120-ஐத் தாண்டியது. சீனாவும் தனது கச்சா எண்ணெய் இறக்குமதிக்கு இந்த நீரிணையையே பெரிதும் நம்பியுள்ளதால், டிரம்பின் இந்த நடவடிக்கையைச் சீனா ஆதரிக்கிறது.

ஈரானுக்கு ஆயுதங்கள் வழங்கும் நாடுகளுக்கு 50% கூடுதல் வரி (Tariff) விதிக்கப்படும் என டிரம்ப் ஏற்கனவே எச்சரித்திருந்தார். சீனாவின் இந்த இணக்கம் அந்தப் பொருளாதாரப் போரைத் தவிர்க்க உதவும்.

பாகிஸ்தானில் அமெரிக்கா-ஈரான் இடையே 2-ஆம் கட்டப் பேச்சுவார்த்தை நடைபெற்று வரும் சூழலில், சீனாவின் இந்த நிலைப்பாடு ஈரானுக்குப் பெரும் அழுத்தத்தை ஏற்படுத்தும் என எதிர்பார்க்கப்படுகிறது.