மகாத்மா காந்தியின் கொள்ளுப்பேரன் துஷார் காந்தி தடுத்து வைப்பு!

மகாத்மா காந்தியின் கொள்ளுப்பேரனும் சமூக ஆர்வலருமான துஷார் காந்தி, கரப்பான் பூச்சி ஜனதா கட்சி (CJP) போராட்டத்துக்கு ஆதரவு தெரிவிக்கச் சென்றபோது மும்பை போலீசாரால் தடுத்து வைக்கப்பட்டார். இந்தச் சம்பவம் அரசியல் வட்டாரத்தில் பரபரப்பை ஏற்படுத்தியுள்ளது.

இந்திய தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று வலியுறுத்தி, டெல்லியில் உள்ள ஜந்தர் மந்தரில் சிஜேபி அமைப்பினர் போராட்டம் நடத்தத் திட்டமிட்டிருந்தனர். இதற்கு ஆதரவு தெரிவிக்கும் வகையில் மும்பையின் ஆகஸ்ட் கிராந்தி மைதானத்திலும் போராட்டம் நடத்த அழைப்பு விடுக்கப்பட்டிருந்தது.

இந்தப் போராட்டத்தில் பங்கேற்க இருந்த துஷார் காந்தியை, மும்பையின் பாந்திரா பகுதியில் போலீசார் தடுத்து நிறுத்தி டி.என். நகர் காவல் நிலையத்துக்கு அழைத்துச் சென்றனர். ஆகஸ்ட் கிராந்தி மைதானத்தில் போராட்டம் நடத்த அனுமதி பெறப்படவில்லை என்றும், சட்டம்-ஒழுங்கைப் பாதுகாக்க முன்னெச்சரிக்கை நடவடிக்கை எடுக்கப்பட்டதாகவும் போலீசார் தரப்பில் தெரிவிக்கப்பட்டது.

துஷார் காந்தி கைது செய்யப்பட்டதாக சில செய்திகள் குறிப்பிட்டாலும், மும்பை போலீசார் அவர் கைது செய்யப்படவில்லை என்றும் தடுத்து வைக்கப்பட்டதாகவும் தெரிவித்ததாக தி இந்தியன் எக்ஸ்பிரஸ் செய்தி வெளியிட்டுள்ளது. அவர் சுமார் 10 மணி நேரத்துக்குப் பிறகு விடுவிக்கப்பட்டதாகவும் தகவல் வெளியாகியுள்ளது.

துஷார் காந்தி தடுத்து வைக்கப்பட்டதற்கு சிவசேனா (உத்தவ் தாக்கரே) உள்ளிட்ட கட்சிகளின் தலைவர்கள் கண்டனம் தெரிவித்துள்ளனர். இதற்கிடையே, போராட்டங்களைத் தடுக்கும் வகையில் மும்பையின் பிற பகுதிகளிலும் போலீஸ் பாதுகாப்பு அதிகரிக்கப்பட்டது.தேர்தல் ஆணையத்தின் செயல்பாடுகள் மற்றும் வாக்காளர் பட்டியல் திருத்தம் தொடர்பான குற்றச்சாட்டுகளை முன்வைத்து சிஜேபி போராட்டங்களை அறிவித்துள்ளது. இந்தக் குற்றச்சாட்டுகள் தொடர்பாக அரசியல் விவாதங்கள் தொடர்ந்து நடைபெற்று வருகின்றன.