'TV Man of India' ராஜா சிங் காலமானார் - எலக்ட்ரானிக்ஸ் புரட்சியின் நாயகன்!

இந்திய மின்னணுத் துறையின் பிதாமகன் என்று போற்றப்படும் ராஜா சிங் (90) மறைவு, இந்தியத் தொழில் துறைக்கு ஈடுசெய்ய முடியாத பேரிழப்பாகக் கருதப்படுகிறது. 1970 மற்றும் 80-களில் இந்திய நடுத்தர வர்க்கக் குடும்பங்களின் கனவாக இருந்த 'டெக்ஸ்லா' தொலைக்காட்சிகளின் பின்னால் இருந்த அந்தச் சாதனையாளரின் வாழ்வு இன்றைய தலைமுறையினருக்கு பெரும் பாடம். 

பஞ்சாப் மாநிலம் லூதியானாவில் வசித்து வந்த ராஜா சிங், வயது முதிர்வு காரணமாகக் காலமானார். சாதாரண மக்களும் தொழில்நுட்பத்தைப் பயன்படுத்த வேண்டும் என்ற அவரது தொலைநோக்குப் பார்வைதான் இந்தியாவின் மின்னணுத் துறையில் பெரும் மாற்றத்தை ஏற்படுத்தியது.

தனது பயணத்தை 1961ல் 'ஜூபிடர் ரேடியோ' மூலம் தொடங்கினார். அக்காலத்தில் ரேடியோ என்பது பணக்காரர்களின் அடையாளமாக இருந்த நிலையில், மலிவு விலை டிரான்சிஸ்டர்களைத் தயாரித்து சாமானிய மக்களின் வீடுகளுக்கு இசையையும் செய்திகளையும் கொண்டு சென்றார்.

1970களில் இவர் உருவாக்கிய 'டெக்ஸ்லா' பிராண்ட் இந்தியா முழுவதும் ஒரு வீட்டுப் பெயராக மாறியது. நடுத்தர வர்க்கத்தினர் எளிதில் வாங்கக்கூடிய விலையில் பிளாக் அண்ட் ஒயிட் மற்றும் கலர் தொலைக்காட்சிகளை அறிமுகம் செய்து 'TV Man of India' என்ற பட்டத்தைப் பெற்றார்.

ராஜா சிங் வெறும் தொழிலதிபர் மட்டுமல்ல, இந்தியாவிலேயே பொருட்களை உற்பத்தி செய்யும் 'மேக் இன் இந்தியா' தத்துவத்திற்குப் பல தசாப்தங்களுக்கு முன்பே முன்னோடியாகத் திகழ்ந்தவர். வெளிநாட்டு பிராண்டுகள் ஆதிக்கம் செலுத்திய காலத்தில், இந்தியத் தொழில்நுட்பத்தின் மூலம் வெற்றி பெற முடியும் என்று நிரூபித்தவர்.

அவரது மறைவுக்குப் பல்வேறு தொழில் துறைத் தலைவர்களும், பஞ்சாப் மாநில அரசியல் பிரமுகர்களும் தங்களது இரங்கலைத் தெரிவித்து வருகின்றனர். இந்தியாவின் எலக்ட்ரானிக்ஸ் துறை இன்று அடைந்துள்ள வளர்ச்சிக்கு வித்திட்டவர்களில் ராஜா சிங் முக்கியமானவர்.

டெக்ஸ்லா நிறுவனம் ஒரு காலத்தில் ஆசியாவிலேயே மிகப்பெரிய தொலைக்காட்சித் தயாரிப்பு நிறுவனங்களில் ஒன்றாகத் திகழ்ந்தது. இன்றைய ஸ்மார்ட் டிவி யுகத்திற்கு அடித்தளம் போட்ட இத்தகைய ஜாம்பவான்களின் பங்களிப்பு, இந்தியத் தொழில் வர்த்தக வரலாற்றில் என்றும் நிலைத்திருக்கும்