அரசியல் பரபரப்பு... தவெக தலைவர் விஜய் இன்று அவசர ஆலோசனை!

தமிழக சட்டமன்றத் தேர்தல் முடிவுகளுக்குப் பிறகு ஆட்சியமைப்பதில் நீடித்து வரும் இழுபறியைத் தொடர்ந்து, தமிழக வெற்றிக் கழகத் தலைவர் விஜய் இன்று (மே 7) தனது கட்சியின் முக்கிய நிர்வாகிகளுடன் அவசர ஆலோசனையில் ஈடுபடுகிறார். பனையூரில் உள்ள கட்சித் தலைமை அலுவலகத்தில் நடைபெறும் இந்தச் சந்திப்பில், ஆட்சியமைக்கத் தேவையான 118 எம்.எல்.ஏ.க்களின் ஆதரவைத் திரட்டுவது குறித்துத் தீவிரமாக விவாதிக்கப்பட உள்ளது. ஏற்கனவே 113 எம்.எல்.ஏ.க்களின் ஆதரவுடன் ஆளுநரைச் சந்தித்த விஜய்க்கு, மெஜாரிட்டியை நிரூபிப்பதில் ஏற்பட்டுள்ள சட்டச் சிக்கல்களைக் களைவது குறித்து இந்த ஆலோசனையில் முக்கிய முடிவுகள் எடுக்கப்பட உள்ளன.

ஆளுநரின் நிபந்தனைகள் ஒருபுறம் இருக்க, திமுக மற்றும் அதிமுக இடையே ஏற்பட்டுள்ளதாகக் கூறப்படும் ரகசியக் கூட்டணி குறித்த தகவல்கள் தவெக தரப்பை அதிர்ச்சியடையச் செய்துள்ளன. இந்த அரசியல் நெருக்கடியைச் சமாளித்து, மக்களின் தீர்ப்புக்கு மதிப்பளிக்கும் வகையில் எவ்விதமான அடுத்தகட்ட நகர்வுகளை மேற்கொள்ள வேண்டும் என்பது குறித்து விஜய் தனது சட்ட வல்லுநர்களுடன் ஆலோசித்து வருகிறார். மேலும், காங்கிரஸ் மற்றும் பிற கூட்டணி கட்சிகளின் ஆதரவை இறுதி செய்து, மீண்டும் ஆளுநரைச் சந்திப்பதற்கான காலக்கெடு குறித்தும் இக்கூட்டத்தில் விவாதிக்கப்பட வாய்ப்புள்ளதாகத் தெரிகிறது.

பதவியேற்பு விழாவிற்கான ஏற்பாடுகள் நேரு உள்விளையாட்டு அரங்கில் விறுவிறுப்பாக நடந்து வரும் வேளையில், இந்த அவசர ஆலோசனை அரசியல் வட்டாரத்தில் பெரும் எதிர்பார்ப்பை உருவாக்கியுள்ளது. ஆட்சியமைப்பதில் முட்டுக்கட்டை போடும் சக்திகளை முறியடிக்கவும், தொண்டர்களுக்குத் தெளிவான வழிகாட்டுதல்களை வழங்கவும் விஜய் திட்டமிட்டுள்ளார். இந்த ஆலோசனைக் கூட்டத்தின் முடிவில், தமிழகத்தின் புதிய அரசு அமைவது குறித்த மிக முக்கியமான அறிவிப்பு வெளியாகலாம் என்பதால், தவெக தொண்டர்கள் மிகுந்த ஆவலுடன் பனையூர் அலுவலகம் முன்பு குவிந்து வருகின்றனர்.