பாஜக கூட்டணிக்கு இடமில்ல... தவெக இணைப் பொதுச்செயலாளர் சிடிஆர் நிர்மல் குமார் அதிரடி!

தமிழக சட்டமன்றத் தேர்தல் முடிவுகளுக்குப் பிறகு தவெக ஆட்சியமைக்கத் தேவையான ஆதரவைத் திரட்டும் பணியில் தீவிரமாக ஈடுபட்டுள்ள நிலையில், பாஜக தலைமையிலான தேசிய ஜனநாயகக் கூட்டணியில் இருந்து யாரையும் அழைக்கும் எண்ணம் தங்களுக்கு இல்லை எனத் தவெக இணைப் பொதுச்செயலாளர் சிடிஆர் நிர்மல் குமார் திட்டவட்டமாகத் தெரிவித்துள்ளார். கம்யூனிஸ்ட் கட்சியின் மாநிலச் செயலாளர் வீரபாண்டியனை இன்று நேரில் சந்தித்துப் பேசிய பிறகு செய்தியாளர்களிடம் பேசிய அவர், சட்டப்படி ஆட்சி அமைக்கத் தவெக-வை ஆளுநர் அழைக்க வேண்டும் என வலியுறுத்தினார். விஜய் முதலமைச்சராகப் பதவியேற்பதை ஒட்டுமொத்தத் தமிழகமும் விரும்புவதாக அவர் பெருமிதத்துடன் குறிப்பிட்டார்.

விசிக, கம்யூனிஸ்ட் மற்றும் ஐ.யு.எம்.எல். ஆகிய கட்சிகளிடம் தவெக ஆதரவு கோரியுள்ள நிலையில், அவர்களின் முடிவிற்காகக் காத்திருப்பதாக நிர்மல் குமார் கூறினார். "அனைவருக்கும் ஆட்சியில் பங்கு தரப்படும்" என்பதே தங்களது தலைவர் விஜய்யின் நிலைப்பாடு எனவும் , இதற்காகத் தேசிய ஜனநாயகக் கூட்டணியின் ஆதரவை ஒருபோதும் கோரப்போவதில்லை என்றும் அவர் தெளிவுபடுத்தினார். ஆளுநர் அரசியல் சாசனப்படி செயல்படுவார் எனத் தவெக நம்புவதாகவும், அவரின் முடிவிற்குப் பிறகே அடுத்தகட்ட நடவடிக்கைகள் எடுக்கப்படும் எனவும் அவர் தனது பேட்டியில் சுட்டிக்காட்டினார்.

ஏற்கனவே தவெக-விற்கு வழங்கப்பட்ட காவல்துறை பாதுகாப்பு, விஜய்யின் வேண்டுகோளுக்கிணங்கத் திரும்பப் பெறப்பட்டுள்ள சூழலில், மக்கள் அளித்த தீர்ப்பின்படி தவெக ஆட்சி அமைப்பதே முறையாக இருக்கும் என அவர் தெரிவித்தார். தனிப்பெரும் கட்சியாக உருவெடுத்துள்ள தவெக-வை ஆட்சியமைக்க அழைக்காமல் முட்டுக்கட்டை போடுவது ஜனநாயகத்திற்கு அழகல்ல என்றும் அவர் வருத்தம் தெரிவித்தார். தமிழகத்தின் புதிய அரசியல் மாற்றத்திற்கான அடித்தளம் அமைக்கப்பட்டுள்ள நிலையில், கூட்டணி கட்சிகளின் ஆதரவு குறித்த அறிவிப்பு விரைவில் வெளியாகும் என எதிர்பார்க்கப்படுகிறது.