இங்கிலாந்து அமைச்சரவையில் 3 பேருக்கு முக்கியப் பொறுப்புகள்!

இங்கிலாந்தில் புதிய அரசமைக்கும் பணிகள் தீவிரமாக நடைபெற்று வரும் நிலையில், புதிய அமைச்சரவையில் அதிரடி மாற்றங்கள் செய்யப்பட்டுள்ளன. தொழிலாளர் கட்சியைச் சேர்ந்த முக்கிய தலைவர்கள் தங்களது புதிய பொறுப்புகளை ஏற்று அதிகாரப்பூர்வமாகப் பணிகளைத் தொடங்கியுள்ளனர். இதில் இந்திய வம்சாவளியைச் சேர்ந்த 3 நாடாளுமன்ற உறுப்பினர்களுக்கு மிக முக்கிய அமைச்சு மற்றும் பொறுப்புகள் வழங்கி கௌரவிக்கப்பட்டுள்ளது.

பிரிட்டன் அரசாங்கத்தின் முக்கிய நிர்வாகப் பொறுப்புகளில் இந்திய வம்சாவளியினர் மீண்டும் இடம் பிடித்துள்ளது உலகளவில் பெரும் கவனத்தை ஈர்த்துள்ளது.இதன்படி இந்திய வம்சாவளியைச் சேர்ந்த கனிஷ்கா நாராயண், இங்கிலாந்தின் முதலாவது செயற்கை நுண்ணறிவுத் துறை அமைச்சராக நியமிக்கப்பட்டுள்ளார். இவர் வர்த்தகம், அறிவியல் மற்றும் தொழில்நுட்பத் துறைகளுடன் இணைந்து அதிநவீன செயற்கை நுண்ணறிவு சார்ந்த பணிகளைக் கவனிக்கவுள்ளார். அதேபோல் மற்றொரு பெண் உறுப்பினரான சத்வீர் கவுர், நாட்டின் சமத்துவத் துறை அமைச்சராகப் புதிய பொறுப்பை ஏற்றுள்ளார்.

பெண்களுக்கு எதிரான வன்முறைகளைத் தடுத்தல் மற்றும் அனைத்துத் தரப்பினருக்குமான சமத்துவத்தை உறுதி செய்யும் பணிகளை இவர் மேற்கொள்வார்.இவர்களுடன் தொழிலாளர் கட்சியின் முக்கியப் பொறுப்பான உதவிக் கொறடா பதவிக்கு ஹர்பிரீத் உப்பல் நியமனம் செய்யப்பட்டுள்ளார். நாடாளுமன்றத்தில் கட்சியின் விதிமுறைகளை ஒருங்கிணைத்து உறுப்பினர்களைச் சீராக வழிநடத்தும் பணிகளில் இவர் முழுமையாக ஈடுபடுவார். பிரிட்டன் நாடாளுமன்றத்தில் முக்கியப் பதவிகளை இந்திய வம்சாவளியினர் அலங்கரிப்பது இந்திய மக்களுக்குப் பெருமிதத்தை அளித்துள்ளது.