உக்ரைன் மீது ரஷியா சரமாரி தாக்குதல்... 800 டிரோன்கள் ஏவப்பட்டதால் பரபரப்பு!

ரஷியா மற்றும் உக்ரைன் இடையேயான போர் 4 ஆண்டுகளைக் கடந்து நீடித்து வரும் நிலையில், உக்ரைன் மீது ரஷியா தற்போது மிகக் கடுமையான டிரோன் தாக்குதலை நடத்தியுள்ளது. அமெரிக்க அதிபர் டிரம்ப் அமைதி முயற்சிகளை மேற்கொண்டும் பலனின்றி, இந்தப் போர் மேலும் தீவிரமடைந்து வருவது உலக நாடுகளிடையே கவலையை ஏற்படுத்தியுள்ளது. தலைநகர் கீவ் மற்றும் முக்கியத் துறைமுக நகரங்கள் உட்பட மொத்தம் 20 இடங்களில் ரஷியப் படைகள் இந்தத் தாக்குதலை அரங்கேற்றியுள்ளன.

சுமார் 800 டிரோன்கள் மூலம் நடத்தப்பட்ட இந்தத் தாக்குதலை முறியடிக்க உக்ரைனின் வான் பாதுகாப்பு அமைப்புகள் கடுமையாகப் போராடின. இருப்பினும், பல டிரோன்கள் இலக்குகளைத் தாக்கி வெடித்ததில் 6 பேர் பரிதாபமாக உயிரிழந்தனர். குழந்தைகள் உட்படப் பலர் படுகாயமடைந்து மருத்துவமனையில் அனுமதிக்கப்பட்டுள்ளனர். பல மணி நேரம் நீடித்த இந்தத் தாக்குதல், இந்தப் போரில் ரஷியா நடத்திய மிக நீண்ட மற்றும் கொடூரமான தாக்குதல்களில் ஒன்றாகக் கருதப்படுகிறது.

இந்தத் தாக்குதலால் உக்ரைனின் மேற்கு நகரமான லிவிவ் மற்றும் ஒடெசா துறைமுகப் பகுதிகளில் பெரும் சேதம் ஏற்பட்டுள்ளது. குடியிருப்புகள் மற்றும் முக்கியக் கட்டடங்கள் இடிந்து விழுந்ததால் அந்தப் பகுதியே போர்க்களமாகக் காட்சியளிக்கிறது. போரை நிறுத்தப் பல்வேறு நாடுகள் முயற்சி செய்தும், ரஷியாவின் இந்தத் தீவிரத் தாக்குதல் அமைதிப் பேச்சுவார்த்தையில் பெரும் பின்னடைவை ஏற்படுத்தியுள்ளது. இதனால் உக்ரைன் மக்கள் மிகுந்த அச்சத்திலும் பாதுகாப்பற்ற நிலையிலும் தவித்து வருகின்றனர்.