காதல் திருமணம் செய்த மகள்! உயிருடன் இருக்கும்போதே இறுதிச்சடங்கு நடத்திய தந்தை – உத்தரபிரதேசத்தில் அதிர்ச்சி

உத்தரபிரதேசம்: பெற்றோரின் எதிர்ப்பை மீறி மாற்றுச் சாதியைச் சேர்ந்த இளைஞரைத் திருமணம் செய்துகொண்ட மகளுக்கு, அவர் உயிருடன் இருக்கும்போதே தந்தை இறுதிச்சடங்கு நடத்திய சம்பவம் அதிர்ச்சியை ஏற்படுத்தியுள்ளது.

பெற்றோர் எதிர்ப்பை மீறி திருமணம்

உத்தரபிரதேச மாநிலம் சந்தோலி மாவட்டத்தைச் சேர்ந்த நேஹா (20), சாவன் என்பவரைக் காதலித்து வந்தார். இருவரும் வெவ்வேறு சாதிகளைச் சேர்ந்தவர்கள் என்பதால், இந்தத் திருமணத்துக்கு நேஹாவின் பெற்றோர் எதிர்ப்பு தெரிவித்ததாகக் கூறப்படுகிறது. இருப்பினும், பெற்றோரின் எதிர்ப்பை மீறி நேஹா, சாவனைப் பதிவுத் திருமணம் செய்துகொண்டார். பின்னர் குடும்பத்தினர் அவரைத் தங்களுடன் திரும்பி வருமாறு அழைத்தபோதும், கணவருடன் வாழ்வதில் அவர் உறுதியாக இருந்தார்.

மகளுக்கு இறுதிச்சடங்கு நடத்திய தந்தை

மகள் தனது பேச்சைக் கேட்காமல் திருமணம் செய்துகொண்டதால், அவரது தந்தை பிரகாஷ் சிங் கடும் ஆத்திரமும் மன உளைச்சலும் அடைந்ததாகக் கூறப்படுகிறது. இதையடுத்து, மகள் உயிரிழந்துவிட்டதாகக் கருதி, அவர் உயிருடன் இருக்கும்போதே முறைப்படி இறுதிச்சடங்கு நடத்தியதாகத் தகவல் வெளியாகியுள்ளது. பெற்றோரின் எதிர்ப்பை மீறித் திருமணம் செய்த மகளுக்கு தந்தையே இறுதிச்சடங்கு நடத்தியதாகக் கூறப்படும் இந்தச் சம்பவம், அப்பகுதியில் பரபரப்பை ஏற்படுத்தியுள்ளது.