அமெரிக்கா - ஈரான் அமைதிப் பேச்சுவார்த்தையில் முன்னேற்றம்... போர் அபாயம் குறையுமா?!

கடந்த பிப்ரவரி 28 அன்று அமெரிக்கா மற்றும் இஸ்ரேல் நாடுகள் இணைந்து ஈரான் மீது நடத்திய வான்வழித் தாக்குதல்களுக்குப் பிறகு, இரு நாடுகளுக்கும் இடையே கடுமையான போர்ச் சூழல் நிலவி வந்தது. இந்நிலையில், பாகிஸ்தான் நாட்டின் மத்தியஸ்தத்துடன் தற்பொழுது நடைபெற்று வரும் அமைதிப் பேச்சுவார்த்தையில் சில முக்கிய முன்னேற்றங்கள் ஏற்பட்டுள்ளதாகப் புதிய தகவல்கள் வெளியாகியுள்ளன.

கடந்த ஏப்ரல் 8 அன்று அறிவிக்கப்பட்ட தற்காலிகப் போர்நிறுத்த உடன்பாட்டைத் தொடர்ந்து, இரு நாடுகளும் தங்களின் கோரிக்கைகளைத் தூதரக ரீதியாகப் பரிமாறி வந்தன. இதன் தொடர்ச்சியாக, ஈரான் அரசு தனது திருத்தப்பட்ட 14 அம்ச அமைதித் திட்டத்தை  பாகிஸ்தான் தூதரகத்தின் வழியாக அமெரிக்காவிடம் சமர்ப்பித்துள்ளது. இந்தப் புதிய திட்டத்தில், போரை முழுமையாக முடிவுக்குக் கொண்டு வருவது மற்றும் தங்களுக்கு விதிக்கப்பட்டுள்ள கடுமையான பொருளாதாரத் தடைகளை நீக்குவது போன்ற கோரிக்கைகளுக்கு ஈரான் முக்கியத்துவம் அளித்துள்ளது.

ஈரானின் இந்த 14 அம்சத் திட்டத்திற்குப் பதிலளிக்கும் வகையில் அமெரிக்க தரப்பிலிருந்து சில சாதகமான சிக்னல்கள் கிடைத்துள்ளதாகத் தெரிகிறது. பேச்சுவார்த்தை நடைபெறும் இந்தக் இடைக்காலக் கட்டத்தில், ஈரான் மீதான 'OFAC' (அமெரிக்க வெளிநாட்டு சொத்துக் கட்டுப்பாட்டு அலுவலகம்) விதித்துள்ள சில பொருளாதாரத் தடைகளைத் தற்காலிகமாகத் தளர்த்த அல்லது விலக்கிக்கொள்ள அமெரிக்க அதிபர் டொனால்ட் டிரம்ப் நிர்வாகம் சம்மதம் தெரிவித்துள்ளதாக ஈரானின் அதிகாரப்பூர்வ 'தஸ்னிம்' செய்தி நிறுவனம் குறிப்பிட்டுள்ளது.

இருப்பினும், இந்த அமைதி ஒப்பந்தம் இன்னும் முழுமையான இறுதி வடிவத்தை எட்டவில்லை. அமெரிக்க அதிபர் டொனால்ட் டிரம்ப் தனது 'ட்ரூத் சோஷியல்' பக்கத்தில் விடுத்துள்ள எச்சரிக்கையில்:

"ஈரான் இந்த உடன்படிக்கைக்கு உடனே வர வேண்டும்; இல்லையெனில் அந்த நாடு முற்றிலும் அழிக்கப்படும்" என்று கடுமையான தொனியில் எச்சரித்திருந்தார்.

இருப்பினும், வளைகுடா நாடுகளின் தலைவர்களின் கோரிக்கையை ஏற்று, கடந்த செவ்வாய்க்கிழமை நடத்தத் திட்டமிடப்பட்டிருந்த அடுத்தகட்ட வான்வழித் தாக்குதல்களைத் டிரம்ப் தற்காலிகமாக ரத்து செய்துள்ளார். தற்போதைய பேச்சுவார்த்தை "இறுதிக்கட்ட எல்லையில்"  உள்ளதாகவும், அடுத்த ஓரிரு நாட்களுக்கு அமெரிக்கா பொறுமையுடன் காத்திருக்கும் என்றும் டிரம்ப் தெரிவித்துள்ளார்.

அமைதிப் பேச்சுவார்த்தையில் முன்னேற்றம் ஏற்பட்டாலும், இரு நாடுகளுக்கும் இடையே இரண்டு முக்கிய விஷயங்களில் இன்னும் ஒருமித்த கருத்து எட்டப்படவில்லை. ஈரான் தங்களின் வான்வழித் தாக்குதலில் தப்பிய 900 பவுண்டு அதிவிகித செறிவூட்டப்பட்ட யுரேனியத்தை தங்களுக்குக் கையளிக்க வேண்டும் என்று அமெரிக்கா நிபந்தனை விதித்துள்ளது. ஆனால், ஈரான் தனது அணுசக்தித் திட்டத்தில் முழுமையான கட்டுப்பாடுகளை ஏற்க மறுத்து வருகிறது.

உலக எண்ணெய் வர்த்தகத்தின் முக்கியப் பாதையான ஹார்முஸ் ஜலசந்தியைத் தனது முழு முகாமைத்துவக் கட்டுப்பாட்டின் கீழ் (PGSA) கொண்டு வர ஈரான் முயல்கிறது. இதனை அமெரிக்கா மற்றும் ஐக்கிய அரபு அமீரகம் ஆகிய நாடுகள் கடுமையாக எதிர்த்து வருகின்றன.

தற்பொழுது பாகிஸ்தான் ராணுவத் தளபதி அசிம் முனீர் உள்ளிட்ட சர்வதேச மத்தியஸ்தர்கள் ஈரானுக்கு நேரடியாகச் சென்று பேச்சுவார்த்தை நடத்தவுள்ளதால், வரும் நாட்களில் இந்தப் போர்ச் சூழலுக்கு நிரந்தரத் தீர்வு கிடைக்குமா என்பது தெரியவரும்.