வீரமணி போக்சோ வழக்கு: கோயம்பேடு உதவி ஆணையர் யாஸ்மினும் காத்திருப்போர் பட்டியலுக்கு மாற்றம்!

ஜெம் கிரானைட்ஸ் உரிமையாளர் வீரமணி தொடர்பான போக்சோ வழக்கில், சென்னை கோயம்பேடு சரக உதவி ஆணையர் எம்.ஏ. யாஸ்மின் காத்திருப்போர் பட்டியலுக்கு மாற்றப்பட்டுள்ளார்.வீரமணி மீது சிறுமி பாலியல் வன்கொடுமை தொடர்பாக வழக்குப்பதிவு செய்யப்பட்டிருந்த நிலையில், இந்த வழக்கை விசாரித்த காவல்துறை அதிகாரிகள் போதிய ஆதாரங்கள் இல்லை எனக் கூறி முடிப்பு அறிக்கை தாக்கல் செய்ததாக தகவல் வெளியாகியுள்ளது.

அப்போது விபச்சார தடுப்புப் பிரிவு உதவி ஆணையராக பணியாற்றிய யாஸ்மின் தலைமையிலான குழு இந்த வழக்கை விசாரித்ததாக கூறப்படுகிறது. போலீசார் தாக்கல் செய்த முடிப்பு அறிக்கையை போக்சோ சிறப்பு நீதிமன்றம் ஏற்க மறுத்து, வழக்கை மீண்டும் விசாரிக்க உத்தரவிட்டது.

இதையடுத்து வழக்கு மீண்டும் தீவிரமாக விசாரிக்கப்பட்டதாகவும், வீரமணி உள்ளிட்ட சிலர் போக்சோ சட்டத்தின் கீழ் கைது செய்யப்பட்டதாகவும் தெரிவிக்கப்பட்டுள்ளது.

இந்த நிலையில், ஏற்கனவே தாக்கல் செய்யப்பட்ட முடிப்பு அறிக்கை தொடர்பாக யாஸ்மின் உள்ளிட்ட சில போலீஸ் அதிகாரிகளிடம் மத்திய குற்றப்பிரிவு போலீசார் விசாரணை நடத்த நடவடிக்கை எடுத்துள்ளனர். இதற்காக அவர்களுக்கு சம்மன் அனுப்பப்பட்டதாக தகவல் வெளியாகியுள்ளது.

இதற்கிடையே, கோயம்பேடு சரக உதவி ஆணையராக பணியாற்றி வந்த யாஸ்மினை உடனடியாக பணியில் இருந்து விடுவித்து, காவல்துறை தலைமையகத்தின் காத்திருப்போர் பட்டியலுக்கு மாற்றி டி.ஜி.பி. மகேஷ் குமார் அகர்வால் உத்தரவிட்டுள்ளார்.இந்த நடவடிக்கை நிர்வாக ரீதியானது என்றும், யாஸ்மின் மீது குற்றம் நிரூபிக்கப்பட்டதாக இதனை கருத முடியாது என்றும் குறிப்பிடத்தக்கது. வீரமணி வழக்கு தொடர்பான விசாரணை மற்றும் அதில் சம்பந்தப்பட்ட அதிகாரிகளிடம் நடைபெறும் விசாரணையின் அடிப்படையில் அடுத்தகட்ட நடவடிக்கைகள் இருக்கும் என எதிர்பார்க்கப்படுகிறது.